PAG-AHON SA PANDEMYA UNA SA PROGRAMA NI BONGBONG

BONGBONG MARCOS-5

KASAMA ang pagtaas sa sahod ng nurses at healthcare workers sa bansa sa nilalaman ng ‘Tawid-Covid, Beyond Covid’ na programa ni presidential aspirant Ferdinand ‘Bongbong’ Marcos, Jr. sa oras na mapagtagumpayan ang 2022 elections.

Gamit ang ‘Tawid-Covid, Beyond Covid’ program, binabalak patibayin ni Marcos ang buong healthcare system ng bansa sa pamamagitan ng paglalaan ng mas malaking pondo para sa pasahod at benepisyo ng mga healthcare workers, pagdagdag sa mga pampublikong ospital at pagpapalakas ng medical research capability ng bansa.

Magiging katuwang ni Marcos sa pagbuo ng programang ito ang ilang mga kinatawan mula sa medical and scientific research sectors ng bansa.

Naniniwala si Marcos na dapat gawing prayoridad ang pagsasaayos sa kalagayan ng mga frontline medical workers kabilang na ang mga nurses upang masigurong matibay ang health care system ng bansa sa gitna ng pandemya.

Ang mababang pasahod ang isa sa mga itinuturong dahilan kung bakit nagpapasya ang maraming nurses na mangibang bansa upang kumita ng mas malaki o kaya naman ay lumipat sa panibagong career.

Ayon sa tala ng pamahalaaan, may 75,000 nars ang nagtatrabaho sa pampubliko at pampribadong mga hospital ngunit kapos pa rin ang bansa ng aabot sa 109,000 nurses.

Ayon pa nga sa isang news report, ang mga nurse mula sa Pilipinas ang may pinakamababang sahod sa Southeast Asia.  Aabot lamang sa P40,000 ang karaniwang sahod kada buwan ng mga local nurses kumpara sa mga nurse sa Singapore na kumikita ng P200,000 kada buwan.

“Panahon na upang harapin natin ang puno’t dulo ng problema sa kakulangan natin sa mga nurse – at ito ay patungkol sa mababang pasahod sa kanila.  Hindi tama na yung mga halos magkanda-kuba sa pagtatrabaho pa ang binabarat sa pasahod.  At dahil ang Covid19 ay magiging bahagi na ng pang araw-araw na pamumuhay natin, ngayon natin sila dapat mas suportahan at alagaan.  Binubuo natin ang isang programa sa tulong ng ating mga kasama mula sa iba’t-ibang sektor at ito ang magiging gabay natin sa pagsasaayos ng ating healthcare system,” sabi ni Marcos.

Ikinabahala rin ni Marcos ang kakulangan sa mga pampublikong ospital sa buong bansa na siyang naungkat nang tumama ang Covid19 pandemic.

“Nagulat ako ng malaman ko na mula 1986 ay wala pang naitayong major hospital sa bansa na gaya ng Heart Center, NKTI, at Lung Center of the Philippines.  Ang mga specialty hospitals na ito pa rin ang naasahan natin magpahanggang ngayon.  Dapat nating dagdagan ang bilang ng mga ospital na kasing moderno ng mga ito upang mas maraming Pilipino ang maserbisyuhan at makaiwas sa mataas  na bayaring medikal”  ayon pa kay Marcos.

Ang isa rin sa pangunahing problema na lumutang dahil sa pandemya ay ang import dependence ng bansa pagdating sa mga bakuna at mga medisina na panggamot sa Covid19.

“Naging malaking problema para sa atin ang supply ng gamot dahil nakaasa tayo sa imported na gamot.  Maiiwasan lang natin ito kung magkakaroon tayo ng sariling kakayahang magsaliksik at makagawa ng mga ito sa bansa.  Malaking pondo ang kakailanganin upang makamit ito pero mas maraming buhay ang ating maliligtas bunga nito,” ayon pa kay Marcos.

“Kailangan nating mahikayat ang mga ekspertong pinoy na nagtatrabaho sa ibang bansa na umuwi upang dito magsagawa ng research at kasabay nito, dapat nating gawing mas moderno ang ating mga research institutions ,” dagdag pa ni Marcos.

Ikinatuwa rin ng dating senador ang napabalitang interes ng bansang Sri Lanka sa positibong resulta ng clinical trials na isinasagawa ng DOST sa Virgin Coconut Oil (VCO) bilang adjunct treatment para sa Covid19.  Hinikayat niyang muli na bilisan ang mga ginagawang trials para sa iba pang alternatibong gamot laban sa Covid19 gaya ng Tawa-tawa at Lagundi.

“Patunay lamang ito na dapat maging bukas tayo sa mga alternatibong gamot laban sa Covid19.  Ang pinapakitang magandang bisa ng VCO laban sa Covid19 ay napakaganda dahil magkakaroon tayo ng mura at epektibong panggamot sa  Covid19.  Sana rin ay bilisan ang mga pag-aaral sa Tawa-tawa at Lagundi upang mas marami na tayong magamit,” ayon pa kay Marcos.

Leave a Reply

Your email address will not be published. Required fields are marked *