SISILIPIN ni House Assistant Majority Leader Bernadette Herrera-Dy ang pagbaba ng remittances sa mga OFW.
Batay sa tala ng Bangko Sentral ng Pilipinas, tumaas naman sa 2.4% o $23.7 billion ang remittance growth ng mga OFW mula Enero hanggang Setyembre ngayong taon.
Ayon kay Herrera-Dy, bagamat mataas pa rin naman ang OFW remittances ngayong taon mas mataas pa rin ang remittances ng mga OFW noong nakaraang taon na nasa 4.7%.
Pinakamataas na growth rate sa OFW remittances ay naitala nitong Marso na nasa 4.4% habang pinakamababa ay 1.3% at ang average growth rate ay nasa 2.9%.
Sinabi ng lady-solon na mataas pa rin naman ang OFW remittances kung ikukumpara sa foreign direct investments na nasa $7.4 billion lamang sa unang walong buwan ng 2018.
Pero, mula Enero hanggang Setyembre 2018, bumagsak sa 17.3% o bumaba ng halos $1 billion ang remittances ng mga OFW sa Gitnang Silangan na hinihinalang nakaapekto sa growth rate ngayong taon.
Susuriin din ng kongresista kung saan pang mga bansa bumaba ang OFW remittances. CONDE BATAC
