BUNSOD ng sunod-sunod na mga insidente ng sunog sa iba’t ibang bahagi ng Pilipinas, kailangan nating magbigay ng pansin sa mga isyu at hamong kaakibat nito.
Ang mga sunog ay hindi lamang nagdudulot ng pinsala sa ari-arian at kabuhayan, kundi pati na rin sa buhay ng mga mamamayan.
Isa sa mga pangunahing sanhi ng sunog ay ang kakulangan sa kagamitan, kasama na ang kaukulang pagpapahalaga sa fire safety measures.
Sa maraming mga lugar, ang mga fire hydrant ay hindi sapat o kaya’y hindi maayos ang pagkakabuo, na nagiging hadlang sa agarang pagtugon sa sunog.
Dagdag pa rito, ang kawalan ng kaalaman at kamalayan sa tamang pag-iingat at pagpigil ng sunog sa mga komunidad ay nagpapalala sa sitwasyon.
Maraming mga residente ang hindi sapat ang kaalaman sa tamang paggamit ng mga kagamitang pang-apoy, at sa tama o mga dapat gawin sa panahon ng sunog.
Sa harap ng mga hamong ito, mahalaga na ang national government at ang mga lokal na pamahalaan ay kumilos upang tugunan ang suliraning ito.
Dapat itaguyod ang kampanya sa fire safety at ang pagpapatupad ng mga regulasyon ukol sa fire prevention sa lahat ng antas ng lipunan.
Kailangang magkaroon nang tuloy-tuloy at masusing pagsasanay at edukasyon tungkol sa fire safety sa mga paaralan at komunidad upang maipalaganap ang tamang kaalaman at pag-unawa sa panganib ng sunog.
Ngayong pumasok na kasi ang buwan ng Marso, hindi lamang ito ang panahon ng pagtanggap sa tag-init, kundi ito rin ang pambansang pagdiriwang ng Fire Prevention Month sa Pilipinas.
Sa bawat taon, ang buwan na ito ay nagbibigay-diin sa kahalagahan ng pag-iingat at pagtugon sa banta ng sunog, isang sakuna na maaaring magdulot ng malawakang pinsala sa buhay at ari-arian.
Sa ating bansa, kung saan ang karamihan sa mga pook ay napaliligiran ng mga informal settler communities at mga imprastrukturang gawa sa kahoy at light materials, ang panganib ng sunog ay palaging nakatutok sa ating mga komunidad.
Sabi nga, sa bawat sunog, hindi lamang ang mga ari-arian ang nawawasak, kundi ang buhay at kabuhayan ng maraming tao rin.
Isa raw sa mga pangunahing layunin ng Fire Prevention Month ay ang pagpapalaganap ng kaalaman sa tamang paggamit ng kagamitan at pag-iingat sa paligid upang maiwasan ang mga sanhi ng sunog.
Sa pagpapalaganap ng impormasyon tungkol sa tamang paggamit ng koryente, pagsasagawa ng fire drills, at pagtukoy sa mga maaaring maging sanhi ng sunog tulad ng sigarilyo at hindi ligtas na pagluluto, nagiging mas handa ang mga komunidad sa anumang sakuna.
Mahalagang bigyan ng prayoridad ang mga programa at proyekto na may kinalaman sa pag-iingat laban sa sunog.
Dapat mas palakasin pa ang kapasidad ng mga bumbero at mga kagawaran ng pagpapalakas sa pagtugon sa mga insidenteng ito.
Dagdag pa, mahalaga ring magkaroon ng masusing pagsusuri at pagrepaso sa mga patakaran at regulasyon kaugnay ng fire safety.
Tandaan na ang Fire Prevention Month ay hindi lamang dapat na isa lamang pagdiriwang, kundi isang pangaral at paalala sa atin na ang kaligtasan mula sa sunog ay responsibilidad ng bawat isa.
Maaari nating maipagtanggol ang ating mga sarili, ang ating mga pamilya, at ang ating mga komunidad mula sa banta ng sunog. Ito ang tunay na diwa ng Fire Prevention Month na ating dapat isapuso’t isabuhay hindi lamang tuwing buwan ng Marso, kundi sa buong taon.
