PAGSUSPINDE SA TRAIN LAW MAKAAAPEKTO SA  ‘BUILD BUILD BUILD’

MAAAPEKTUHAN nang malaki ang tax collections ng Bureau of Internal Revenue (BIR) sa sandaling suspendihin ng Kongreso ang ipinatutupad na Tax Reform for Acce­leration and Inclusion (TRAIN) law.

Ayon kay BIR Commissioner Caesar ‘Billy’ Dulay, maaapektuhan din ang ‘Build Build Build’ program ni Pangulong Rodrigo Duterte.

Sinabi ng BIR chief na ang plano ng ilang mambabatas na suspendihin ang implementasyon ng TRAIN law ay po­sible ring maging dahilan ng pagbagsak ng koleksiyon ng BIR at ng Bureau of Customs (BOC).

Ang planong suspensiyon ng TRAIN law ay bunsod umano ng naramdamang  pag­hihirap ng mamamayan sa biglaang pagtaas ng presyo ng mga pangunahing bilihin.

Kamakailan ay nagbunyi ang economic managers ni ­Pangulong Duterte nang makalasap ng malaking tax collections ang BIR, ma­ging ang BOC, dahil sa  implementasyon ng TRAIN law.

Labis ding ikinabahala ni Finance Secretary Carlos ‘Sonny’ Dominguez III ang plano ng Kongreso na itigil muna ang pagpapatupad ng TRAIN law.

Bunsod ng implementasyon ng TRAIN law, sinabi ni Dulay na nagpamalas  ng kasipagan sina Metro Manila BIR Regional Directors Marina De Guzman ­(Quezon City), Romulo Aguila, Jr. (City of Manila), Glen Geraldino (Makati City) at Manuel Mapoy (Caloocan City) at naging aktibo sa sunod-sunod na seminars at tax forums na idinaos sa iba’t ibang dako ng bansa.

Ibinida pa ni Commissioner Billy na labis na nasiyahan ang Malacañang  sa tax collection performance ng BIR kung saan tumaas ang excise tax collections ng kawanihan sa ­unang buwan pa lamang ng 2018 o noong Enero na siya ring unang buwan ng pagpapatupad ng TRAIN law.

Umakyat ang koleksiyon ng BIR ng halos 82 percent kum­para  sa mga nakaraang taxable year at ito ay dahil sa implemen­tasyon ng TRAIN law, kung saan nakakuha ng ka­ragdagang buwis ang kawanihan sa siga­rilyo, sasakyan at sugar sweetened be­verages.

Malaki ang kumpiyansa nina Commissioner Billy at newly-installed BIR Deputy Commissioner for Operations Arnel Guballa na magtutuloy-tuloy ang gumagandang tax collections performance ng BIR .

Kagulat-gulat, ­anila, na sa isang iglap ay nagresulta ito sa  tinatayang  P22.078 bilyong koleksiyon  sa excise tax noong ­Enero.

Mas mataas umano ito sa P20.501-B collection target ng BIR.

Sinabi rin ng mga opisyal ng BIR na tumaas din ng hanggang 30 percent ang pondo mula sa TRAIN na mailalaan sa Conditional Cash Transfer Program  ng gobyerno para sa mga maralita.

oOo

Para sa mga komento o opinyon, mag-text lamang po sa 09293652344 o mag-email sa [email protected].