PALARO 2020 SA MARIKINA

SA METRO Manila gaganapin ang ­unang Pa­larong Pambansa ng bagong dekada.

Ang Marikina City ang napiling bagong host ng annual sports meet ng   elementary at high school student-athletes makaraang umatras ang Mamburao, ang orihinal na itinalagang host town para sa 2020.

Ang Mamburao at ang buong lalawigan ng Occidental Mindoro ay labis na sinalanta ng bagyong Tisoy, na direktang tumama sa buong Mindoro Island.

Base sa findings ng disaster risk management office ng Occidental Min­doro, ang pag-atras sa Palarong Pambansa hosting ay iminungkahi.

Kinumpirma ni Education Undersecretary Revsee Escobedo, sa isang memorandum na ipinagkaloob kay Marikina Schools Division officer-in-charge Sheryll Ga­yola, na papalitan ng Marikina ang Mamburao bilang host ng Palaro sa susunod na taon.

Nakasaad sa nasabing liham na nakatakdang magpadala si Escobedo, ang  secretary-general ng meet, ng management team sa Marikina Sports Center upang inspeksiyunin ang venue at ang ilang lugar na maaaring pagdausan ng ilang laro.

Ito ang unang pagkakataon na magi­ging host ang Marikina City sa Palarong Pambansa, samantalang ito ang ika-5 hosting ng Metro Manila sa meet magmula noong 1966. PNA