(Panawagan  ng Filipino priest) DASAL, TULONG SA MGA BIKTIMA NG BUSHFIRES SA AUSTRALIA

NANAWAGAN ng pana­langin at tulong ang Filipino priest  na si Fr. Joel Llave para sa mga mamamayang biktima ng malawakang bushfire sa ilang bahagi ng Australia.

Ayon kay Llave, pa­rish priest at administrator ng Saints Mary and Joseph Cathedral sa Armidale New Southwales, Australia, sa ngayon ay patuloy silang nakararanas ng bushfire sa kanilang lugar habang pa­tuloy pa rin ang sunog sa iba pang bahagi ng ­Australia na ang ilan din ay dahil sa sadyang panununog o arson.

“At these time medyo clear na dito sa area namin. We had the bushfire around November-December talagang napaka-usok n’ya on a daily basis. And now it’s toward the west and the south of Australia. So we really are asking for prayers para umulan sa Australia,” aniya, sa panayam ng church-run Radio Veritas.

Ibinalita ni Llave na may pag-ulan na sa ilang lugar, subalit higit pa rin itong kailangan lalo na sa mga lugar na hindi pa naaapula ang sunog.

“Kasi ang bushfire ay natural tendency dahil ang gum trees may mga dagta talaga na flammable so natural ang bushfire, kaya lang siguro dahil sa dami ng nangyayari and some are with houses and properties kaya mabigat talaga,” dagdag pa ng pari.

Aniya pa, patuloy rin ang mga parokya at bawat diyosesis sa Australia sa pagsasagawa ng special collection para magbigay ng tulong sa mga residenteng nasunugan at nawalan ng mga ari-arian.

“In our own little way merong mga special collections para sa mga affected families lalo na nu’ng Christmas…every week we have the prayer for rain, since last year pa. And in our area we have water restriction,” ayon pa sa pari.

Umiiral na rin aniya ang pag-usal ng Oratio Imperata para sa pagkakaroon ng ulan at ang pagtitipid sa paggamit ng tubig lalo’t tag-init ngayon sa Australia.

Tinatayang may 300 Filipino ang kabilang din sa mga biktima ng bushfire sa Australia, kung saan umaabot na sa 12 million acres o higit sa 4 na mil­yong ektarya ng lupa ang nasusunog dahil sa bushfires.

Sa kabuuan ay may hi­git sa 200,000 Filipino ang mga nagtatrabaho at nani­nirahan sa Australia ayon na rin sa 2016 report ng Australian Bureau of Statistics. ANA ROSARIO HERNANDEZ