(Panawagan ng solon) MEDIA WORKERS MAGPABAKUNA NA

HINIMOK ni House Assistant Majority Leader at ACT-CIS Partylist lRep. Rowena Niña Taduran ang lahat ng miyembro ng media na magpatala na at magpabakuna laban sa COVID-19 ngayong sinimulan na ng pamahalaan ang vaccination rollout para sa mga nabibilang sa A4 priority group.

Pagbibigay-diin ng ranking lady House official, sa pagganap ng kanilang tungkulin, partikular ang araw-araw na pagkalap ng mga balita at impormasyon, ang mga manggagawa sa media ay nahaharap sa malaking posibilidad na makakuha ng nasabing virus

“Hindi huminto ang mga balita simula nang magka-pandemya. Walang nag-off the air at hindi naman nahinto ang printing ng mga diyaryo. Patuloy rin ang mga balita online. Araw-araw na kinakaharap ng mga taga-media ang panganib ng Covid 19. Sa katunayan, marami nang media workers ang nagka-Covid dahil sa pagtupad sa kanilang mga tungkulin kahit wala pang bakuna,” ayon pa kay Taduran.

Ngayong Hunyo, inaasahang darating ang 10 milyon pang doses ng bakuna laban sa COVID-19, kaya hinihikayat ni Taduran ang lahat ng manggagawa sa media na magpalista sa local government unit (LGU) na nakasasakop sa kanila.

“The best protection is whatever vaccine is available. Huwag nang mamili, lalo na at pinag-aralan naman nang husto ang mga bakuna bago ito ibigay sa mga mamamayan,” giit ng kongresista.

Tiniyak din ni Taduran na mabibigyan ng karagdagang proteksiyon ang mga manggagawa sa media habang ginagawa nila ang kanilang tungkulin sa inaasahang pagpasa ng Media Workers Welfare Bill.

“Inaasahan nating bago matapos ang taong ito ay mayroon nang batas na magbibigay ng proteksiyon sa mga manggagawa sa media. Tamang suweldo at seguridad sa trabaho, sapat na equipment para sa proteksiyon at insurance ang nakahanda para sa media workers kapag ito ay ganap nang batas,” pagtatapos ni Taduran. ROMER R. BUTUYAN