SULTAN KUDARAT – DEAD on the spot ang isang pulis nang pagbabarilin ito ng riding in tandem suspect sa Sultan Kudarat.
Ayon sa Sultan Kudarat-PNP, patay sa pamamaril ang biktima na kinilalang si Patrolman Asraph Pasandalan Mato, 31-anyos, may asawa, at nakatalaga sa 1401st Regional Mobile Force Company ng RMFB PRO-BARMM, at residente ng Barangay Semba, Datu Odin Sinsuat, Maguindanao.
Lumilitaw sa pagsisiyasat na sakay ng kanyang motorsiklo ang biktima mula sa kanyang duty at papauwi na sana sa kanilang tahanan.
Habang binabaybay ang national road sakop ng Barangay Gang sa Sultan Kudarat ay dinikitan ang biktima ng riding in tandem suspects at pinagbabaril gamit ang kalibre .45 na pistola.
Nalaglag ang biktima sa kanyang sinasakyan na motorsiklo sa gilid ng national highway at nang matiyak ng mga salarin na patay na ang kanilang target ay mabilis na tumakas sa crime scene.
Sa pagsusuri, nagtamo ng tama ng punglo sa ulo at likod ang pulis na naging sanhi nang daglian nitong kamatayan.
Kasalukuyang nagpapatuloy ang imbestigasyon sa krimen kasabay ng pag-alam sa posibleng motibo ng mga hindi pa nakikilalang suspek. VERLIN RUIZ
Comments are closed.