PASAHERO NG LRT BAWAL BUMABA SA ROOSEVELT STATION

HINDI na papayagang bumaba ng Roosevelt station sa Quezon City ang mga pasahero ng LRT1 mula kahapon, Enero 4 hanggang sa Marso 31 ng taong ito.

Ang mga pasahero ng Light Rail Transit Line 1 na patungo sa  Roosevelt  ay maaring bumaba  sa isa o dalawang  istasyon  bago ang Roosevelt  dahil sa pagpapatupad ng three-month temporary passenger traffic scheme upang bigyang daan ang konstruksion ng  ‘common station’ ang Unified Grand Central Station.

Ang common station ay kung saan hihinto  ang  mga tren ng LRT1, MRT3 at MRT7.

Sa panahong ito ay hindi maa­aring tumigil ang mga nasabing tren sa Roosevelt Station. Ang kanilang final stop ay sa Monumento o Balintawak Station.

Para sa mga bababa ng  Roosevelt, isang  special shuttle train  ang darating kada  10 minuto sa Balintawak sa peak hours  upang eksklusibong maghatid ng pasahero sa Roosevelt.

Ang shuttle train  din na ito ang maghahatid  sa mga pasahero sa Roosevelt bound south.

Ayon sa DOTr, ang Common Station  ay  ang matagal nang naantalang proyekto na umabot ng siyam na taon dahil na rin sa  naging problema sa actual location  ng  Area B na kamakailan ay naungkat sa pagitan ng kagawaran at ng  Ayala Land Inc.

Inaasahang matatapos ang Common Station sa  susunod na taon.