DAVAO ORIENTAL- PATAY ang tatlo katao kabilang ang isang paslit matapos na mabundol ng isang rumaragasang saksakyan na naganap sa Barangay Calapagan Lupon sa lalawigang ito.
Batay sa report ng pulisya, ang mga biktima ay nakilalang sina Joselito Semiros, 58-anyos; Camille Toledo, 23-anyos at anak nito na si Adessa Toledo, 2-anyos.
Lumitaw sa pagsisiyasat ng pulisya, kasalukuyang naglalakad sa gilid ng kalsada ang mga biktima nang araruhin ng isang Toyota Vios na minamaneho ng suspek na nakilalang si Vicente Ambayec, 48-anyos.
Ayon sa pahayag ng suspek na hindi niya napigilan ang kanyang manibela matapos na iwasan nito ang isang aso at dalawang motorsiklo sa kabilang linya.
Kasalukuyang nasa kustodiya na ng pulisya ang naturang suspek at nakatakdang sampahan ng kaukulang kaso. EVELYN GARCIA
