PISAK ang ulo ng isang 9-anyos na batang lalaki matapos magulungan ng truck kamakalawa ng hapon sa Tondo, Maynila.
Humiwalay sa leeg ang ulo, sumabog ang utak ng biktimang si Mark Angelo Persia, residente ng Building 9 Temporary Housing, Vitas, Tondo, Maynila.
Naaresto naman ng mga awtoridad ang driver ng truck na si Robert Soriaga, 47-anyos ng 40 Don Pepe Street, Brgy. Sto. Domingo, Quezon City.
Batay sa imbestigasyon ni SSg Johnny Acebes ng Vehicle Traffic Investigation Section (VTIS) ng Manila Police District (MPD), dakong ala-5 ng hapon nang mangyari ang aksidente sa northbound lane ng Delpan Service Road, kanto ng San Simon St., sa Tondo.
Nauna rito, nagmamaneho si Soriaga ng tractor head (TWT-400) na may trailer (TUF-225) sa naturang lugar nang mahagip at masagasaan ng kanang hulihang gulong ang biktima na noon ay nasa kalsada.
Agad umanong binawian ng buhay ang paslit.
Sinampahan ng kasong reckless imprudence resulting in homicide sa Manila Prosecutors Office ang driver.