PASYENTENG MAY MILD SYMPTOMS NG COVID-19 ‘WAG NANG DALHIN SA OSPITAL–DOH

PINAALALAHANAN  ng isang opisyal ng Department of Health (DOH) ang mga pagamutan sa bansa na sa mga temporary treatment at monitoring facilities na lamang muna i-refer ang mga pasyente ng coronavirus disease 2019 (CO­VID-19) na asymptomatic o mayroon lamang mild symptoms.

Ito’y upang maiwasan  ang congestion sa mga pagamutan lalo na ngayong panahong patuloy pa rin ang pagdami ng CO­VID-19 infections na naitatala nila sa bansa.

“Part po ng protocol na kapag mild at asymptomatic, ire-refer po sa temporary treatment and monitoring facility para ‘di po ma-congest ang a­ting hospitals,” ayon kay Health Undersecretary Maria Rosario Vergeire, sa isang online media forum nitong Miyerkoles.

Kaagad namang ni­linaw ni Vergeire na hindi ito nangangahulugan na tatanggihan ng mga pagamutan ang mga CO­VID-19 patients na hindi kritikal o hindi malala ang kondisyon.

Aniya, kailangan pa rin itong tingnan ng mga doktor bago i-refer sa mga treatment facilities.

Samantala, ang mga mild at asymptomatic COVID-19 patients naman aniya na may pre-existing conditions ay maaari namang payagang ma-confine sa pagamutan dahil ikinukonsidera silang vulnerable sa naturang karamdaman.

Nauna rito, inihayag ng DOH na may 11 nang pagamutan sa Metro Manila ang nagdeklara na nasa full capacity na o may 100% occupancy na ang kanilang mga COVID-19-dedicated beds.

Sa pinakahuling datos ng DOH, na inilabas nitong Martes (Hulyo 7) ng hapon, nasa halos 48,000 na ang bilang ng mga pasyenteng tinamaan ng COVID-19 sa Filipinas. ANA ROSARIO HERNANDEZ