PCSO HALIGI NG BAGONG PILIPINAS

MULING kinilala ang Philippine Cha­rity Sweepstakes Office (PCSO) bilang isa sa pinakamahusay na Government-Owned and Controlled Corporations (GOCCs) ng Governance Commission for GOCCs (GCG) sa ikalawang sunod na taon. Isa itong patunay sa hindi matatawarang dedikasyon ng ahensiya sa pagbibigay-serbisyo at pagtataguyod ng mabuting pamamahala.

Ngayong taon, dalawang natatanging parangal ang iniuwi ng PCSO. Una, kinilala ito bilang isa sa pinakamataas na ranggo sa 2023 Performance Scorecard ng GCG. Ikalawa, naabot nito ang perpektong marka sa Stakeholder Relationship Section ng Corporate Governance Scorecard mula 2021 hanggang 2023.

Hindi na bago sa PCSO ang ganitong karangalan. No­ong nakaraang taon, pinarangalan din ito bilang “Most Improved GOCC” matapos makapagtala ng kahanga-hangang 92.03% rating sa Performance Scorecard. Ang tagumpay na ito ay lalong nagpapatibay sa kanilang reputasyon bilang isa sa mga maaasahang ahensiya ng gobyerno.

Sa pamumuno ni General Manager Melquiades Robles at ng kanyang Board of Directors, patuloy na nalalampasan ng PCSO ang mga hamon ng panahon.

Binigyang-diin ni GM Robles na ang kanilang tagumpay ay hindi lamang mga numero, kundi isang simbolo ng kanilang ‘di matitinag na layunin at ito ay ang maglingkod sa bawat Pilipino.

Aniya, “Ang aming mga tagumpay ay repleksyon ng aming responsibilidad na magbigay ng serbisyong may malasakit at tumugon sa direktiba ng Pangulo tungo sa ‘Bagong Pilipinas.’”

ng malasakit na ito ay makikita sa bawat programa ng PCSO, mula sa mga medical assistance hanggang sa mga community outreach projects. Sa gitna ng mabilis na pagbabagong dulot ng modernisasyon, nananatiling matibay ang kanilang layunin na maglingkod nang may integridad at dedikas­yon.

Sa ilalim ng Performance Evaluation System (PES) ng GCG, sinusukat ang kakayahan ng mga GOCC batay sa malinaw na mga target at pamantayan. Ang sistemang ito ay hindi lamang nagtataguyod ng kultura ng kahusayan, kundi tumutulong din sa mga ahensya na maabot ang kanilang mga layunin nang may epektibong pamamaraan.

Ang patuloy na tagumpay ng PCSO sa pagsusuri ng GCG ay nagpapakita ng tamang direksyon na tinatahak ng ahensya. Ito rin ay isang paalala sa iba pang mga GOCC na ang tamang pamamahala at dedikasyon ay nagbubunga ng tiwala mula sa pamahalaan at mamamayan.

Ang pagkilala sa PCSO bilang isa sa pinakamahusay na GOCC ay hindi lamang tagumpay ng ahensya kundi ng bawat Pilipinong natutulungan nito. Sa bawat hakbang tungo sa mas mahusay na serbisyo, ang PCSO ay nagiging haligi ng Bagong Pilipinas—isang bansang may malasakit, maayos na pamamahala, at progresibong kinabukasan.

Kaya naman, bilang mga Pilipino, nawa’y patuloy nating suportahan ang PCSO at iba pang ahensyang nagsusumikap para sa kabutihan ng lahat. Ang kanilang tagumpay ay tagumpay na­ting lahat. Ang bawat lotto ticket na ating binibili, bawat programang sinusuportahan, ay hakbang tungo sa isang mas maayos at masaganang bayan.