PAMPANGA- TINANGGAL sa puwesto ang provincial director ng Pampanga Police Provincial Office makaraan ang pagsalakay ng awtoridad sa Philippine Offshore Gaming Operator (POGO) hub sa bayan ng Porac.
Ang pagtanggal sa puwesto kay Col Levi Hope Basilio ay upang bigyan daan ang imbestigasyon sa umano’y scamming activities at iba pang iregularidad sa POGO hub sa nasabing bayan.
Pansamantalang mangangasiwa sa Pampanga Provincial Police ang pinuno ng Police Regional Office 3 na si Regional Director, BGen Jose Hidalgo.
Magugunitang sinalakay ng mga tauhan ng Presidential Anti-Organized Crime Commission (PAOCC) ang POGO complex kasunod ng inisyung warrant ng Malolos Regional Trial Court Branch 14 laban sa mga opisyal at tauhan ng nasabing pasilidad.
Sa record ng awtoridad, nakatanggap sila ng reklamo hinggil sa iregularidad gaya ng malaswang aktibidad at pananakit sa male foreigners. EUNICE CELARIO