PEKENG PULIS TIMBOG SA TAUHAN NG PHIL. ARMY

RIZAL- ARESTADO ng dalawang tauhan ng 80th Infantry Battalion ang isang alyas “Enry” at nasamsam dito ang pekeng ID ng PNP, baril at pampasabog sa Rodriguez sa lalawigang ito.

Sa ulat ng pulisya, patungo umano sa base patrol ng 80th Infantry Battalion sa Barangay Macabud, dakong alas- 4:30 ng hapon kamakalawa sina John Gilbert Cataneda Mostoles at Chito Sandoval Azagon nang mamataan ang suspek na may nakabukol sa kanyang baywang.

Dahil dito, agad pinara nina Mostoles at Sandoval ang suspek na sakay ng motorsiklo at dinisarmahan.

Narekober sa suspek ang isang kalibre 45 pistol, isang magazine, 5 bala, dalawang 40mm projectile, iba’t-ibang IDs kabilang ang pekeng ID ng PNP, pekeng driver license at Philhealth.

Nabatid pa na nagpakilala pa umanong pulis ang suspek ng arestuhin ngunit nadiskubreng peke ang PNP ID nito.

Inaalam na ng awtoridad ang pagkatao ng suspek at iba pang anggulo.

Samantala, nakapiit na ang suspek sa Rodriguez PNP at nakatakdang sampahan ng kasong illegal possession of firearms and explosives at ammunition.
ELMA MORALES