PENSIYON ‘DI KOMISYON

MAGANDA ang layunin ni Manny Pacquiao sa boxing, higit sa Pinoy boxers. Kung may direktang nakauunawa sa damdamin, sakripisyo at paghihirap ng mga fighter, kapado ‘yan ni Pacquiao. ‘Ika nga, kabisado niya ang likaw ng bituka, maging ang itinatagong kalokohan ng boxing promoters, managers at match makers.

Kaya hindi kataka-taka nang ihain niya sa Senado ang Senate Bill 2077 (An Act Creating the Philippine Boxing and Combat Sports Commission) na ang layunin batay sa impormasyong inihain ni Senator Pacquiao ay nakatuon sa promosyon ng boxing at combat sports, gayundin ang pangangalaga sa mga atleta higit sa panahon ng kanilang pagreretiro.

Tama. Makabuluhan. May saysay.

Ngunit, mestisong hilaw, ika nga ng mga miron sa sabungan ang naturang programa. Kung may mga adviser si Pacman nang gawin ang naturang bill,  tila hindi nabusising mabuti ang mga detalye. Hindi nahimay nang todo ang tunay na kailangan ng mga professional boxer.

Hindi maikakaila na hindi nakakuha ng suporta ang naturang bill sa mga kapwa niya senador nang pagdebatehan ang Komisyon ni Pacquiao.  Kumbaga sa salitang kanto, tapos na ang boxing sa first round pa lang. TKO. Knockout.

Sa public hearing, iginiit ni Senator Pia Cayetano na ang gawain at responsibilidad ng PBCSC na nais ni Pacquiao ay ginagawa na at nagagampanan nang tama at maayos ng Games and Amusements Board (GAB).

Dagdag pasanin pa sa tax payers ang P150 milyon na pondo ng PBCSC para ipansuweldo sa Chairman at apat na Commissioners na siyang magpapa-takbo ng naturang komisyon. Mula nang itatag ang GAB may ilang dekada na ang nakalilipas, ni hindi umabot sa P150M ang taunang pondo nito mula sa national budget. Hindi lamang boxing bagkus lahat ng professional sports sa bansa ang nasa pangangasiwa nito.

Sa mga panahong nagsisimula si Pacquiao, posibleng naranasan niya ang kawalan ng suporta ng ahensiya. Ngunit, sa kasalukuyan, sa pamumuno ni Chairman Abraham ‘Baham’ Mitra, nareporma ang GAB at kabilang sa programa  nito ang libreng medical, drug test, dental at MRI examination  sa mga local boxers at combat sports fighter.

Nais ni Pacquiao na masigurong makabuluhan ang propesyon ng boxing at hindi pupulutin sa kangkungan ang mga fighter sa panahong ng kanilang pagreretiro. Dapat at karapat-dapat. Subalit, hindi komisyon bagkus pensiyon ang dapat ibigay at siguraduhing matatanggap ng mga boxer sa pagtatapos ng kanilang career.

Ngunit, ang masakit na katotohanan, hindi kabilang ang pensiyon sa pondo ng GAB dahil walang batas para rito. Nakalulungkot isipin na ang isang dayuhan sa katauhan ng boxing promoter at pilantropong si Naris Singwangcha ang naglaan ng sariling pera para rito. Nitong 2018, sinimulan ng Thai promoter – na labis ang paghanga at respeto sa Pinoy boxers – ang pamimigay ng P3,000 monthly allowance para sa mga Pinoy world champion mula sa apat na boxing organizations (WBC, WBA, WBO and IBF). Natigil lamang ang programa nang maapektuhan ang mga negosyo bunsod ng COVID-19 pandemic.

Muling lalaban si Pacquiao sa susunod na buwan kontra Amerikanong si Errol Spence. Ano man ang maging resulta, hindi maaapektuhan ang kabuhayan ni Pacman na masinop na nakapagtabi ng kanyang kinita sa panahon ng kanyang pagreretiro. Hindi niya kailangan ang pensiyon. Ngunit karamihan sa ating mga fighter ay hindi kasimpalad ni Pacman. Sa pagtatapos ng kanilang career, kailangan nila ang ayuda mula sa pamahalaan.

Hindi pa huli ang lahat, kung hindi pasado ang PBCSC, maaring maghain ng bagong bill si Pacquiao na nakatuon lamang sa paglalaan ng pensiyon. Sa huli, ito ang mas nararapat. Hindi kailangan ang bagong Komisyon na posibleng pagsimulan lamang ng bagong korupsiyon. Higit na kailangan at malapit sa bituka ng mga Pinoy boxer ang pensiyon.



(Para sa reaksiyon at suhestiyon, ipadala sa [email protected])

Related posts:

(2 PBA games kanselado) 4 PLAYERS POSITIBO SA COVID-19 PAGPAPATUPAD NG ‘SAFETY AND HEALTH’ PROTOCOL KINATIGAN NG GAB (Sa gitna ng COVID-19 restrictions sa NCR) PBA GAMES TIGIL MUNA VIETNAM SEAG PAGHAHANDAAN NG PH RIDERS TOKYO PARA GAMES ATHLETE, COACHES, OFFICIALS  POSITIBO SA COVID-19 PSC TULOY ANG SUPORTA SA PARALYMPIANS (Sa gitna ng paglobo ng COVID-19 cases) TRANSAKSIYON SA GOBYERNO I-DIGITAL NA RMSC FACILITIES IPINANGALAN SA SPORTS HEROES