KABUUANG siyam na medalya ang naiuwi ng Philippine delegation sa katatapos na Asian Youth Para Games na ginanap sa Manama, Bahrain.
Nakopo ni para swimmer Ariel Alegarbes ang gold medal sa S14 butterfly multiclass Category, at silver medals sa SB14 100m breaststroke at 100m backstroke.
Nasungkit naman ni para table tennis player Linard Sultan ang dalawang silvers mula sa men’s singles class 8 at men’s mixed team.
Nagwagi rin sina para athletes Ronn Russel Mitra (T20 400M) at Daniel Enderes, Jr. (T20 1500m) ng silvers.
Samantala, nagkasya sina para swimmer Angel Otom (100m freestyle S1-S10 multiclass age 16-18 category) at para table tennis player Mary Eloise Sable (women’s mixed team) sa bronze medals.
Ang Pilipinas ay may delegado rin para sa wheelchair basketball, badminton, at boccia. CLYDE MARIANO
