(Pinagnakawan pa) KILLER NG 82-ANYOS NA HAPONESA TINUTUGIS

LAGUNA – ISANG 82-anyos na Haponesa ang natagpuang walang buhay matapos pagnakawan ng hindi pa nakikilalang bilang na miyembro ng Akyat Bahay sa Bgy. Pulo lungsod ng Cabuyao.

May busal sa bibig habang nakatali pa ang mga kamay at paa ng madatnan sa loob ng kanyang kuwarto ng nagrespondeng miyembro ng Brgy. Tanod ang biktimang si Meizawa Reiko, biyuda, tubong Chiva, Japan at naninirahan sa Millwood Subdivision ng nabanggit na Barangay.

Sa imbestigasyon ni PSMS Carmelo Cordero, mayhawak ng kaso, bandang alas- 8:15 ng umaga nang madiskubre ng kanyang katulong ang biktima habang nakahandusay at wala nang buhay sa loob ng kanyang kuwarto.

Sinasabing sa pamamagitan ng pagdaan sa kisame, nakapasok ng mga kawatan sa loob ng bahay na lingid sa kaalaman ng biktima habang nag-iisa at mahimbing sa kanyang kuwarto pasado alas-2:00 ng madaling araw.

Tinangay ng mga kawatan sa kanilang pagtakas ang laptop, cellphone at mga alahas ng biktima habang patuloy na inaalam ng pulisya ang posibleng pagkakakilanlan sa mga ito para sa isasagawang agarang pag-aresto. DICK GARAY