(Pinasasalo sa Pinas) FACTORIES AALIS SA CHINA

DAPAT na maging agresibo ang gobyerno na mahikayat ang mga dayuhang manufacturer na nakaambang umalis sa China kaysa mapunta pa ang mga ito sa ibang panig ng Asya kapag nalampasan na ang COVID-19.

Ito ang inihayag ni Senate Committee on Economic Affairs chair Senator Imee Marcos na nagsabing nagbabalak na ang Japan, United States at European Union na ilipat ang produksiyon ng kanilang mga kinakailangang produkto dahil sa naging kakulangan ng supply mula China bunsod ng COVID-19 pandemic.

Ayon kay Marcos, mismong mga Chinese manufacturer ay nagpaplano na ring ilipat sa mga kalapit-bansa nito ang kanilang negosyo para makaiwas sa mataas na bayad sa taripa na ipinatutupad ng US sa China-made products para sa mga American company tulad ng Apple, Google at Microsoft.

“Ang Filipinas ay may mahuhusay na mga manggagawa at mas marunong sa wikang Ingles kaysa ibang taga-Asya, pero kinakailangang maging mabilis at masusing pag-aralan ng ating mga economic manager  ang mga insentibong alok ng Vietnam, Thailand, Malaysia at Indonesia na nakalalamang sa bansa sa paghikayat ng mga dayuhang investor,” ani Marcos.

Kaugnay nito, itinutulak ni Marcos ang Senate Bill 1024 na mag-aamyenda sa Foreign Investment Act para makapagtatag ng Investments Promotion Council at makapagdagdag pa ng mga matagal nang na-delay na insentibo para sa mga dayuhang investor.

Kabilang sa mga insentibong nakapaloob sa Marcos bill ang pagtaas ng  foreign ownership limit, pagbaba sa USD2.5-million na kailangang kapital para makapagsimula ng kanilang negosyo, pagpapadali sa pagkuha ng mga permit ng pamahalaan at gawing kasong kriminal ang anumang mga pagkakamaling may kinalaman sa pagkuha nito.

“Ang umuusbong na takbo ng ekonomiya sa mundo dahil sa COVID-19 ay isa ring panawagan para balikan ang CITIRA (Corporate Income Tax and  Incentives Reform Act),” ani Marcos, na nagsabing nauunahan na ng mga karatig- bansa ang Filipinas sa panukala nitong amyendahanmula 30% pababa sa 20% sa loob ng 10  taon ang corporate income tax o buwis ng mga kompanya.

Sinabi ni Marcos na ang Indonesia ay magtatapyas na ng corporate income tax mula 25% hanggang 20% sa susunod na taon.

Giit ni Marcos, dapat bilisan ng pamahalaan ang pagkilos at manmanan ang galaw ng ibang bansa tulad ng India na matinding karibal ng Filipinas  sa manufacturing at business process outsourcing o BPO, na nagtatapyas na ng corporate taxes o buwis ng hanggang 15% at aktibong nakikipagnegosasyon sa mga Japanese investor at mga grupo ng negosyante.

“Ang dapat maging resulta ng CITIRA bill ay mapigil ang manufacturing companies na umalis sa ating mga export zone, at maging daan para masamantala ang nakaambang pag-alis ng mga pabrika sa China,” dagdag pa ng senadora. VICKY CERVALES