(Pinatitiyak sa DOE) SAPAT NA PLANTA NG KORYENTE

NABABAHALA si Senador Win Gatchalian sa napipintong pagpapasara sa tatlong hydroelectric power plants sa Benguet kaya hiniling niya sa  Department of Energy (DOE) na gamitin ang mandato nito para maresolba ang isyu.

“Sa panahon na may mga pagbabanta na malalagay sa yellow at red alerts ang suplay ng koryente sa Luzon, kailangan nating siguruhin na may sapat tayong bilang ng mga plantang gumagana at maaasahan sa mga susunod na araw. Kailangang-kailangan natin ang sapat na suplay ng koryente sa ganitong panahon na nasa gitna pa rin tayo ng isang pandaigdigang krisis sa kalusugan,” ani Gatchalian.

Ang mga pahayag ni Gatchalian ay kaugnay sa pagbibigay ng cease and desist order (CDO) ng National Commission on Indigenous Peoples (NCIP) sa Cordillera sa kompanyang Hedcor Inc., operator ng Labay, Lon-oy at F.L. Singit hydropower plants sa Bakun, Benguet.

Matapos maisilbi ang CDO noong Martes, Hunyo 22, binigyan ang Hedcor Inc. ng limang araw para tapusin na ang kanilang operasyon. Inilabas ang kautusan matapos umanong mabigo ang kompanya na makuha ang basbas ng Bakun Indigenous Tribes Organization (BITO) na siyang nakasaad sa batas.

Sa ilalim ng Indigenous People’s Rights Act of 1997 (IPRA), ang mga project developer ay maaaring maka-pagproseso ng kailangang permits at lisensiya para makapag- operate kapag nabigyan na sila ng Certification Pre-condition (CP) ng NCIP. Ito ay nagpapatunay na pinapayagan sila ng mga katutubo na mag-operate sa kanilang komunidad.

“Ang kinakaharap ng Hedcor Inc. at ng mga pamayanang katutubo ay may kinalaman sa mga legal na usapin, Nakikiusap ako sa NCIP at DOE na pag-usapan ito upang magawan ng paraan kung paano masosolusyunan,” ani Gatchalian.

“Naiintindihan ko na may kaakibat na isyung sumasaklaw sa mga karapatan ng mga kababayan nating IPs sa usaping ito. Ngunit mabigat din ang usaping kinakaharap sa pagpapasara ng mga plantang ito na isa sa mga pinagkukunan ng suplay ng koryente ng mga nasasakupang lugar sa halos tatlong dekada na. Sana ay magkaroon ng resolusyon na katanggaptanggap sa mga kinauukulan sa lalong madaling panahon,” dagdag pa ng senador. VICKY CERVALES

Related posts:

SUPPLY NG KORYENTE SAPAT SA KABILA NG EL NIÑO SUPPLY NG KORYENTE SAPAT (Hanggang sa mga susunod na linggo – DOE) SUPLAY NG KORYENTE SAPAT (Tiniyak ng DOE sa mga susunod na taon) SAPAT NA SUPPLY NG KORYENTE (Pinatitiyak sa DOE sa eleksiyon) SAPAT NA SUPPLY NG KORYENTE (Tiniyak ng DOE) SAPAT NA SUPPLY NG KORYENTE SA MAY POLLS (Dahil sa pagmahal ng coal) DAGDAG-SINGIL SA KORYENTE SA MAYO PRESYO NG KRUDO SA WORLD MARKET, BANTAY-SARADO NG DOE