PNP POPULATION MATATAPOS NANG BAKUNAHAN

ABOT-KAMAY na ng Philippine National Police (PNP) na makumpleto ang kanilang vaccination program habang nasa 219,514 o 98.37% Police personnel ang nabakunahan ng COVID-19 vaccine.

Ang kabuuang bilang ng mga pulis kasama na ang non-uniform police ay nasa 223,150 police force nationwide.

Sinabi ni PNP Deputy Chief for Administration (TDCA) at ASCOTF Commander Lt.Gen. Joselito Vera Cruz, tinatapos ang pagbabakuna sa kanilang mga active personnel na kanilang prayoridad, dahilan para hindi nila masimulan ang vaccination para sa mga menor-de-edad na dependents ng mga pulis.

Posible rin anyang sa susunod na buwan maari na silang magbakuna ng mga dependent ngunit kanilang bibigyang prayoridad ang mga adult dependents bago ang mga minors.

Giit ng Heneral, naka depende kasi ang kanilang vaccine supply sa ibibigay na allocation ng Department of Health (DOH).

Sa ngayon, nasa kabuuang 376,651 doses na ng Covid-19 vaccine ang na-administered nationwide.
Ayon kay Vera Cruz, batay sa kanilang datos nasa 193,347 personnel o 86.64% ang fully vaccinated na ngayon at nasa 26,167 o 11.73% ang naturukan naman ng first dose habang nasa 3,636 o 1.63% ang tumangging magpabakuna.

Iniulat din ni Vera Cruz sa National Headquarters – 92.48% sa mga personnel nito ang fully vaccinated; National Administrative Support Unit (NASU)- 90.94%; National Operations Support Unit (NOSU)- 82.89%; sa mga Police Regional Offices nasa 86.96% ang nakakumpleto na ng kanilang bakuna.

Ang vaccination naman sa mga Police Regional Police Offices (PRO) tatlong rehiyon ang nasa mahigit 90% ang fully vaccinated kung saan ang National Capital Region Police Office (NCRPO) ang nangunguna na may 96.71% personnel ang fully vaccinated.

Samantala, patuloy namang hinihimok ng PNP ang kanilang mga personnel na hindi pa nabakunahan ng Covid-19 vaccine na magpaturok na dahil magbibigay ito ng proteksiyon laban sa nakamamatay na virus. EUNICE CELARIO