PNP UMALMA SA KORUPSIYON SA PAGBILI NG BODY CAMERAS

UMALMA si PNP Chief General Guillermo Eleaz­ar sa kumakalat na alegasyong multi-million anomaly sa likod ng pagbili ng body cameras.

Kaugnay ito ng pag­lalabas ng listahan ni Senador Manny Paquiao ng umano’y mga tiwaling ahensiya ng pamahalaan.

“We are currently coordinating with the office of Sen. Manny Pacquiao to verify if he indeed mentioned the PNP in his alleged list of corrupt go­vernment agencies through the procurement of the body cameras,” anang PNP chief.

Gayunpaman, siniguro ni Eleazar sa publiko na walang nangyaring nakawan ng pondo sa tran­saksiyong ito.

“Fully-accounted ang perang inilaan ng Kongreso sa pagbili nito at sa katunayan ay nakatipid pa nga ang PNP ng mahigit P45 milyon sa transaksyong ito at ang natipid na perang ito ay inilaan na sa pagbili ng mga high-definition CCTVs na siyang gagamitin sa aming operasyon kontra insurgency at terorismo,” paliwanag ni Eleazar.

Nabatid na ang pondong natipid mula sa procurement ng body ca­meras, na nagkakalahaga ng P45,111,006.28 ay isinama sa P19,429,717.08 savings mula naman sa improvement na ginawa sa PNP Command Center para makabili ng CCTV Rapid Deployment System na nagkakalahaga ng P60 million.

Paliwanag pa ng Heneral,ang CCTV Rapid Deployment System ay gagamitin sa counter-terrorism operations sa alin man panig ng bansa.

Binubuo ito ng 10 deployable CCTVs na may Artificial Intelligence, vi­deo management system, 10 CCTV mobile trailers at 10 generators.

Nabatid pa na bawat camera ng CCTV Rapid Deployment System ay maaring kargahan ng hanggang 200 larawan ng mga wanted criminal at terorista.

“If indeed Sen. Pacquiao said that there was corruption in the procurement of bodycams, we would appreciate if he could provide us the details and I assure him that we would look into it,” giit ni Eleazar.VERLIN RUIZ