LA UNION – SA hindi inaasahang pagkakataon, nakapuga ang 25-,anyos na drug suspect na may sintomas ng COVID-19 mula sa La Union police custody matapos nitong ubuhan sa mukha ang police escort nito noong Biyernes ng madaling araw.
Kasalukuyang tinutugis ng mga awtoridad ang suspek na si Teofilo Doctolero Lopez ng San Isidro, bayan ng Agoo.
Ayon sa police report, escorted ni Patrolman Ronald Macalino ang suspek para sumailalim sa medical check-up sa La Union Medical Center dahil nagpapakita ito ng sintomas ng COVID-19.
Habang sakay ng police mobile patrol ay inalis ng suspek ang kanyang facemask at ilang ulit na inubuhan sa mukha si Macalino, dahilan para pahintuin nito ang driver ng mobile patrol upang maghugas ng mukha na sinamantala naman ng suspek na lumundag mula sa sasakyan at tumakas.
Pinagtulungang habulin ng driver at police escort subalit hindi na inabutan ang suspek na nasakote sa buy bust operation ng pulisya noong Oktubre 28.
Ayon kay Ilocos region police director Rodolfo Azurin, nahaharap sa kasong administratibo si Macalino habang naglunsad na ng manhunt operation ang pulisya laban sa suspek. MHAR BASCO
Comments are closed.