PRESYO NG BABOY ‘DI GAGALAW

SAPAT ang supply ng karneng baboy sa Filipinas kahit na itinigil ang pag-aangkat dahil sa African Swine Fever (ASF) na tumama na sa labing anim na bansa.

Inihayag  ni Department of Agriculture  Usec. Ariel Cayanan na tiniyak ng hog raisers sa bansa na sapat ang suplay ng karneng baboy at walang  nakikitang rason para tumaas ang presyo  nito sa pamilihan.

Nakaalarma na ang ASF  kaya naman nakaalerto na ang Filipinas at naglatag ng  bio security measures gaya ng paglalagay ng mga foot bath at X-ray sa mga entry point sa mga port, pagsasanay sa mga sniffing dog para maamoy kung may dalang karneng baboy ang mga papasok sa bansa at pagsasa-nay  na rin sa mga quarantine officer.

Itinigil na  rin ng Food and Drugs Administration (FDA) ang pag-iisyu ng certification of product registration o CPR sa mga pork processed products gaya ng meatloaf, sausage, ham, at iba pang delata.

Hinihikayat  ng DA at FDA ang mga  supermarket, mga tindahan  at iba pang stalls na nagbebenta ng mga processed pork products na magkusa nang tanggalin  ang  ganitong uri ng produkto.

Kasama sa  mga bansang nasa hotlist ng ASF  ang South Africa, Russia, Ukraine, Hungary,  Czech Republic, Moldova, Zambia, Poland, China, kasama ang Hong Kong at Macau, Bulgaria, Belgium, Latvia,  Vietnam, Mongolia, at Cambodia.            ANGELO BAIÑO