PSA PRESIDENT’S AWARD KAY BAMBOL

KABILANG ang taong matapang na pinamunuan ang Philippine sports sa pinakamasamang kalagayan nito sa mga pararangalan ng Philippine Sportswriters Association (PSA) sa pagkilala nito sa top performers at achievers ng 2020 sa susunod na linggo.

Si Philippine Olympic Committee (POC) President Abraham ‘Bambol’ Tolentino ay gagawaran ng President’s Award sa SMC-PSA Annual Awards Night sa TV5 Media Center sa March 27.

Sa kanyang kapasidad bilang congressman ng eighth district ng Cavite, ang  POC chief ay nagpasok ng P180-million item sa Bayanihan to Recover as One Act 2 para mabenepisyuhan ang mga atleta at coach na kabilang sa national team.

Sa ilalim ng bersiyon ng House of Representative sa Republic Act. No. 11494, ang mga miyembro ng national squad ay nagsimulang tumanggap ng kanilang monthly allowances simula noong Nobyembre ng nakaraang taon makaraang tapyasan ito ng kalahati nang magpasiya ang gobyerno na gamitin ang pondo sa anti-COVID-19 pandemic campaign nito.

Ang pagpasa sa Bayanihan Act 2 ay nagbigay-daan din para matanggap ng national team members ng retroactive ang 50 percent cut sa kanilang allowances simula pa noong  July, at kasabay nito ay nagkaloob ng one-time P5,000 pandemic assistance sa Philippine athletes at coaches.

“Even before the din of the victorious Philippine campaign in the 2019 Southeast Asian Games was over, he (Tolentino) proceeded to lead the way for Philippine sports through uncertainty and darkness wrought upon by an invisible and merciless adversity in 2020,” pahayag ni PSA President Tito S. Talao, sports editor ng Manila Bulletin, sa pagkakapili kay Tolentino.

“If for this alone, the Philippine Sportswriters Association President’s Award is most sincerely presented to Rep. Abraham ‘Bambol’ Tolentino, president of the Philippine Olympic Committee.”

Si Tolentino ay kabilang sa special awardees na kikilalanin ng pinakamatandang media organization sa event na co-presented ng Philippine Sports Commission (PSC) at Cignal TV, kasama ang1 Pacman Partylist, Chooks-to-Go at Rain or Shine bilang major backers.

Ang virtual Awards Night, na iho-host nina Gretchen Ho at Carlo Pamintuan, ay mapapanood sa March 28 sa One Sports+ simula alas-7 hanggang alas-8:30 ng gabi.