PUBLIC FUNDS GAMITIN NG MAAYOS AT TAMA

PINAALALAHANAN ni Senador Christopher ‘Bong’ Go  ang government agencies na tiyaking  nagagamit ng  maayos ang  public funds  at suportahan ang digitalizing  ng aid distribution  para sa  transparency at accountability.

Ang panawagan ni Go ay kasunod ng national address ni Pangulong Rodrigo Duterte hinggil sa pagsusulong ng mas mahigpit  na mga hakbang  para masigurong accounted ang mga pondo lalo na ngayong panahon ng  COVID-19 pandemic.

Anang senador,  dapat masiguro ng government agencies na maramdaman at mapakinabangan  ng mga Filipino  lalo na ng mga mahihirap  ang mga pondong inilalaan ng pamahalaan sa pagtulong.

Binalaan din ni Go ang mga government worker  na sinumang mapatunayang umaabuso sa kanilang tungkulin, gagamit ng pondo ng gobyerno sa maling paraan  o masangkot sa korupsiyon  ay pananagutin sa batas.

Hinikayat din nito ang mga manggagawa na tumulong sa mga imbestigasyon para maputol ang ugat ng korupsiyon sa kanilang mga tanggapan.

Binigyang diin ni Go na kumbinsido siyang  marami sa mga empleyado ng  gobyerno ang gusto talagang  magsilbi  nang buong  tapat at may integridad.

Una nang nagbabala si Go na hindi siya magdadalawang-isip na magsalita at papanagutin ang mga sangkot sa katiwalian kahit kaalyado o hindi ng  administrasyon. VICKY CERVALES