PUBLIKO BINALAAN SA NAMEMEKE NG RT-PCR TEST RESULTS

NANAWAGAN si Philippine National Police (PNP) Chief General Guillermo Eleazar sa publiko na huwag maging biktima ng modus ng ilang grupo na nagbebenta ng pekeng swab test o COVID-19 result.

Sinasabing may logo pa ng Philippine Red Cross ang mga pinekeng resulta ng RT-PCR Test para magmukhang authenticated o tunay.

Sa Quezon City, tatlong suspek ang naaresto sa pamemeke ng swab test result kung saan ay kailangang magbayad ang mga biktima ng halos P16,000 para sa pinekeng resulta na gagamitin lamang para makauwi sa kanilang lalawigan .

Ayon kay PGen Eleazar, “Hindi biro ang krimen na pamemeke ng RT-PCR results lalo na’t nasa gitna tayo ng pandemya. Nakasalalay sa mga test results na ito ang kaligtasan at kalusugan ng ating mga kababayan mula sa COVID-19.”

“Kaya noon pa man ay tinututukan na ng ating kapulisan ang pamemeke ng COVID test results at iba pa’ng mga mahalagang dokumento na may kinalaman sa COVID-19,” dagdag pa nito.

Itinanggi ng mga suspek ang alegasyon laban sa kanila matapos dakpin ng Quezon City Police District Station 7 kung saan sila naka kulong.

“I commend our personnel in the Quezon City Police District for their quick action on the complaint regarding the fake RT-PCR results being sold to our kababayan. Isa itong patunay na sa pagtutulungan ng ating mga kababayan sa kanilang PNP, agaran nating marerespondehan ang mga ganitong uri ng modus na lubhang mapanganib dahil sa sitwasyon natin ngayong panahon ng pandemya,” wika ng Chief PNP.

“Patuloy ang operasyon namin tungkol dito at marami-rami na rin ang aming nahuli at nakasuhan sa nakalipas na mga buwan,” dagdag pa niya.

Hinimok pa ni Eleazar ang publiko na iulat sa mga awtoridad kung mabibiktima sila ng mga ganitong klase ng kawatan.

“Ipinapaalala sa ating mga kababayan na huwag tangkilikin ito dahil kasama kayo sa makakasuhan kapag nahuli kayong may bitbit na ganitong pinekeng dokumento,” giit ni Eleazar. VERLIN RUIZ