PULIS, 1 PA KALABOSO SA 'P100 TRUCK PASS'

CAMP CRAME – SWAK sa selda ang isang pulis nang ireklamo ng pangongotong sa Makati City.

Kinilala ang naaresto na si Patrolman John Felix, nakatalaga bilang mobile patroller sa station 2 ng Makati City Police Station.

Kasama rin nitong naaresto ang isang traffic enforcer na kinilalang si Jason Parcon.

Inaresto ang dalawa ng mga tauhan ng PNP Integrity Monitoring and Enforcement Group (PNP IMEG) matapos ang kanilang ikinasang entrapment operation sa Palm Avenue Makati City pasado alas-5 ng madaling araw.

Bago ito ay nakatanggap ng reklamo ang PNP IMEG mula sa truck operator na si Silverio Samson kung saan araw-araw aniyang nanghihingi ang dalawang pulis ng P100 sa mga truck na dadaan bago makapasok sa Dasmariñas Village.

Ito ay kahit na may permit ang truck operator para makapasok sa Dasmariñas Village.

Sasampahan na ng kaso ang dalawa habang nasa kustodiya ng PNP IMEG sa Camp Crame. REA SARMIENTO/ MARIVIC FERNANDEZ