RIZAL- BINARIL at napatay ng isang pulis ang kanyang live-in partner nang mainis ito sa pangbibintang na may kinahuhumalingang ibang babae sa Tanay sa lalawigang ito.
Kinilala ni Col. Dominic Baccay, Rizal PNP Provincial Director ang naarestong pulis na si Cpl. Romie Gie Legasi na nakatalaga sa Tanay Police Station.
Habang kinilala naman ang nasawi na si Rodaville Maguete, live-in partner ng suspek.
Sa ulat ng pulisya, lumilitaw na nagkaroon ng pagtatalo ang mag live-in dakong ala-5:30 kamakalawa ng hapon nang nagselos umano ang biktima at pinagbintangan nito na meron ibang babae ang suspek.
Nauwi sa mainitang pagtatalo na ikinainis ng suspek hanggang sa bumunot ito ng baril at pinaputukan sa ulo ang ka live-in.
Sa press statement ni Baccay, nalulungkot ito sa nangyari at nakikiramay sa naulilang pamilya ng biktima.
Dagdag ni Baccay, asahan ang patas na imbestigasyon sa kaso ng pulis at dapat umanong manaig ang batas para makamit ng pamilya ng biktima ang hustisya at walang sasantuhin sa mga nagkasala sa batas at papatawan umano ng karampatang parusa sakali na mapatunayan ito ay nagkasala.
ELMA MORALES