SUGIRAO DEL NORTE- NASAKOTE ang isang aktibong pulis sa isinagawang buy-bust operation dakong alas 3 ng madaling araw sa may Purok 8, Sitio Cayutan, Brgy. Cagniog, Surigao City.
Batay sa report ang nasakoteng pulis ay nakilalang si Patrolman Elton Jay Alabat Galanida, alyas ‘Cacay’, 28-anyos, at miyembro ng PNP na kasalukuyang nakatalaga sa 2nd Platoon 1ST Surigao Del Norte Provincial Mobile Force Company sa nasabing lugar.
Nabatid sa report, nagtangka pa umanong manlaban ang suspek na siyang naging dahilan kung kaya’t nabaril ito ng kanyang kabaro at agad namang isinugod si Galanida sa pinakamalapit na pagamutan.
Na-recover mula sa pag-iingat ng suspek ang isang piraso One Thousand pesos bill na nagsilbing marked money, dalawang sachet ng pinaghihinalaang shabu na may bigat na 1.4 gramo at market value na hindi bababa sa P9,500, at isa pang sachet ng dahon ng marijuana na aabot sa isang gramo ang bigat kung saan ay nagkakahalaga ng 120 pesos.
Kabilang sa mga nakumpiska sa suspek ang isang unit ng service firearms Caliber 9mm Pistol na may tatlong Magazines at 28 bala.
Napag-alamang ang nasabing pulis ay itinuturing na isang High Value Individual (HVI) sa Surigao del Norte. EVELYN GARCIA