CAVITE CITY- ISANG Puskal o Pusang-Kalye ang iniligtas ng isang pulis sa panganib kahapon sa kahabaan ng kalye Manila-Blvd sa lungsod na ito.
Papunta na sana si SSG Edgie Portacio sa Camp Gen Pantaleon Garcia sa Imus City nang makita niya ang pusang kalye sa gitna ng kalsada habang nasa katirikan ng araw na dahan-dahang naglalakad at makailang beses nang iniwasan ng mga motorista.
Sa halip na lagpasan ng sasakyan at balewalain ang sitwasyon ng pusa ay hindi nagdalawang-isip si Portacio na tumigil at kinuha ito upang ilagay sa mas ligtas na lugar.
Isa ang pusa sa paboritong alagaan ng tao dahil nakakatulong ito sa bahay partikular sa paghuli ng mga daga.
Magugunitang napabalita noon ang isang pusa na nagligtas sa isang sanggol habang nasa duyan na tinangkang tuklawin ng isang ahas.
Si Portacio ay nakatalaga sa Cavite City Component Police Station at 19 na sa serbisyo bilang isang pulis. SID SAMANIEGO