MAGSASAGAWA ang Capital1 Solar Energy ng two-day tryout sa San Sebastian College-Recoletos gym simula ngayong Martes para sa nalalapit na Premier Volleyball League (PVL) season.
Pangungunahan ni Roger Gorayeb, isang multi-titled coach mula sa SSC-R na itinalaga ng magkapatid na Milka at Mandy Romero na pangasiwaan ang Power Spikers, ang tryouts sa tulong ng kanyang capable team.
Halos 100 players mula sa iba’t ibang clubs, colleges, at universities ang nagpahayag ng kanilang intensiyon na lumahok sa tryouts upang ipakita ang kanilang kasanayan sa pinakamainit na sporting league sa bansa at maging bahagi ng pinakabagong koponan sa liga. Sabik na kapwa sina Milka at Mandy hinggil sa kanilang initial venture sa sporting world, bagama’t batid nilang dadaan sila sa butas ng karayom bago hamunin ang mga higante sa liga.
Sina Milka, dating co-captain ng Ateneo football team, at Mandy, nagtapos na Magna Cum Laude sa Georgetown University sa Washington DC, kung saan siya nagpraktis ng Muay Thai, ay nakahanda sa mga naghjhintay na hamon.
