Games Tuesday
(Filoil EcoOil Centre)
4 p.m. – PLDT vs Chery Tiggo
6 p.m. – Creamline vs PetroGazz
NALUSUTAN ng Cignal ang 50-point explosion ni Russian Marina Tushova at sinibak ang Capital1, 25-19, 36-34, 16-25, 22-25, 15-12, sa isang five-set quarterfinal thriller sa Premier Volleyball League Reinforced Conference kagabi sa FilOil EcoOil Centre.
Kinuha ng HD Spikers ang unang semifinal berth, subalit kinailangang hawiin ang paghahabol ng Solar Spikers mula sa 0-2 deficit kung saan ginawa ni Tushova ang lahat upang maisalba ang kanilang conference.
“Grabe talaga ang kapit ng team,” sabi ni Cignal middle blocker Riri Meneses, na humataw ng 7 blocks upang tumapos na may 21 points.
Naprodyus ni Meneses ang pinakamalaking play ng laro, gumawa ng malaking block kay Tushova upang bigyan ang HD Spikers ng 13-10 kalamangan na kanilang naprotektahan hanggang sa pagtatapos ng nerve wracking two-hour, 49-minute contest.
“Ang good thing talaga, hindi kami nag-stop,” wika ni Cignal coach Shaq delos Santos. “Hindi siya madaling kalaban (Capital1). Pupuntos at pupuntos iyan.”
“Sobrang happy at proud ako sa team,” dagdag pa niya.
Ginawa ng Solar Spikers ang lahat upang bigyan si Tushova ng isa pang panalo sa record-setting fashion, subalit mas nangibabaw ang galing ng HD Spikers.
Binura ni Tushova ang dating all-time scoring record ng liga na kanyang naitala sa 20-25, 20-25, 25-16, 25-19, 15-6 panalo ng Capital1 kontra Nxled noong nakaraang August 10. Ito ang ikatlong pagkakataon na nagtala si Tushova ng bagong scoring mark sa PVL.
“I hope the fans enjoyed this game. I gave everything for this game,” wika ni Tushova. “I don’t mind about the record. I wanted for my team to win.
Nangako si Tushova na babalik siya sa Capital1 sa susunod na season para tapusin ang unfinished business.
“I hope I can bring something to this amazing team,” ani Tushova.
Nanguna si MJ Perez para sa Cignal na may 34 points at 15 receptions habang nag-ambag si Ces Molina ng 16 points at 14 receptions. Nakakolekta si libero Judith Abil ng 18 digs at gumawa si setter Gel Cayuna ng 21 excellent sets.