Mga laro bukas:
(Philsports Arena)
4 p.m. – Creamline
vs Farm Fresh
6 p.m. – Kurashiki
vs Cignal
DINISPATSA ng EST Cola ng Thailand ang Farm Fresh, 22-25, 25-17, 19-25, 25-20, 17-15, upang manatili sa kontensiyon para sa podium finish sa Premier Volleyball League Invitational Conference kagabi sa Mall of Asia Arena.
Nagtala si Seetaloed Warisara ng tournament-high 33 points, kabilang ang 2 blocks at 2 service aces, at 11 digs para sa EST Cola na kinuha ang kanilang unang panalo sa conference matapos ang 0-3 simula at tsansa para sa bronze match sa Huwebes.
“I feel good today and I helped a lot in this game,” sabi ni Seetaloed sa pamamagitan ng isang interpreter.
Sa kabila ng kanilang ikatlong sunod na talo, ang Foxies ay may pag-asa pa rin sa bronze.
Ang panalo kontra Creamline sa Miyerkoles ay magbibigay sa Farm Fresh ng tsansang makuha ang pinakamaganda nilang pagtatapos sa PVL.
Ang pagkatalo ay sisibak sa Foxies sa kontensiyon, at magbibigay sa visiting Thai squad ng puwesto sa third place match.
Kumana si Natthawan Phatthaisong ng 3 blocks para sa 18-point effort.
Nanguna si Japanese Asaka Tamaru para sa Farm Fresh na may 19 points at 22 receptions habang nagdagdag si Aprylle Tagsip ng 18 points, kabilang ang 3 service aces.