REHAB SA MANILA BAY 7 TAON

AABUTIN ng pitong taon ang rehabilitasyon ng Manila Bay, ayon sa Department of Envi- ronment and Natural Resources (DENR)

Nakatakdang simulan ang rehabilitation process sa Manila Bay sa Enero  27 at  unang tatamaan dito ay ang  tinatawag na “billionaire’s lane” kung saan matindi ang fecal coliform level.

Lumalabas sa isinagawang pag-aaral ng mga eksperto na mataas sa coliform content ang tubig sa Manila Bay na mapanganib sa kalusu­gan ng mga tao.

Sa isinagawang  ­inspeksiyon ni Environment and Natural Resources Secretary Roy Cimatu sa mga estero sa Maynila, lumalabas na ang mga dumi na galing sa mga ito ay dumidi­retso sa Manila Bay dahil sa kawalan ng sewerage system, treatment plant at sariling septic tank.

Nag-ikot si Cimatu sa estero San Antonio de Abad sa pagitan ng Ospital ng Maynila, Bangko Sentral ng Pilipinas (BSP) at Manila Zoo, nakita niya na walang treatment plant ang zoo kaya inatasan niya ang pamunuan nito na ayusin ang dinadaluyan ng dumi ng mga hayop.

Napag-alaman pa na ang mga sewerage system kung saan konektado ang mga bahay, hotel at iba pang establisimiyento ay napupuno  ngunit  hindi nila ito magawang linisin.

Bunga nito ay uunahin munang alamin ng DENR ang mga estero na posibleng pinagmumulan ng dumi na tumatapon sa Manila Bay  bago ang rehabilitasyon  nito.

Tiniyak ng kagawaran na  sa una o ika­lawang buwan ay  mayroon nang pagbabago sa Manila Bay.

Aabutin ng P47 bilyon  ang magagastos  sa rehabilitasyon  ng Manila Bay kasama na ang  paglilipat sa informal settlers na nasa paligid nito. NENET VILLAFANIA