INANUNSIYO kahapon ng Philippine Olympic Committee (POC) ang appointment ni Cavite Governor Jonvic Remulla bilang Team Philippines Chef de Mission (CDM) sa Paris 2024 Olympics.
Inihayag din ni POC President Rep. Abraham “Bambol” Tolentino ang pagkakatalaga kina wrestling association chief Alvin Aguilar bilang CDM sa World Combat Games at rugby federation head Ada Milby sa 2024 Winter Olympic Youth Games.
Ang Paris Olympics ay nakatakda sa July 26 -August 11 habang ang Winter Olympic Youth Games ay sa January 19-February 1 sa Gangwon Province sa South Korea kapwa sa susunod na taon. Ang World Combat Games ay gaganapin naman sa October 21-30 ngayong taon sa Riyadh, Kingdom of Saudi Arabia.
Pinalitan ni Remulla si Samahang Basketbol ng Pilipinas (SBP) president Al Panlilio, na tumanggi sa appointment sa Paris dahil sa kanyang hectic calendar bilang SBP head and CEO ng PLDT at Smart.
“We understand Al’s [Panlilio] situation so we decided to appoint a new CDM for the Paris Olympics, somebody who has a great passion for sports, a true sportsman, somebody who has leadership, a workhorse and that’s Governor Jonvic [Remulla],” wika ni Tolentino.
Si Remulla, 55, ang honorary chairman ng rowing association at team manager ng University of the Philippines men’s basketball team.
“The POC wanted a dedicated sportsman or personality who could live up to the responsibilities and obligations as CDM to Paris,” sabi pa ni Tolentino.
Aniya, ang appointment ng isang non-national sports association head bilang CDM ay nagawa na noon kay dating First Gentleman Jose Miguel Arroyo. Itinalaga siya bilang CDM sa 2005 Southeast Asian Games na hinost ng Manila.
“He [Remulla] accepted the position without hesitation and he’s really happy and excited about his role as Paris Olympics CDM,” ani Tolentino. “We at the POC are confident that he can get the job done .. he’s a true sportsman and very dedicated to helping athletes.”