REPRODUCTION NUMBER NG COVID-19 SA NCR TUMAAS

TUMAAS  ang COVID-19 reproduction number sa National Capital Region (NCR) ngunit ang overall trend naman ng mga kaso ng impeksiyon ay patuloy namang nababawasan.

Ayon kay Dr. Guido David, ng OCTA Research Group, mula sa 1.39 lamang ay naging 1.41 na ang reproduction number ng COVID-19 sa Metro Manila o yaong bilang ng mga taong maaaring maihawa ng isang pasyente habang nasa 1.32 naman sa buong Pilipinas.

Aniya, bagamat patuloy na dumarami ang mga bagong kaso ng sakit, umaasa silang ang reproduction number ay bababa sa ikatlong linggo ng Setyembre upang mas mapabagal pa ang transmission o hawahan ng virus.

“Sa buong Pilipinas, nasa 1.32. Sa buong NCR, 1.41 ‘yung reproduction number natin. Overall, ang trend niya bumababa,” pahayag pa ni David, sa panayam sa radyo.

Sinabi ng eksperto na ang reproduction number ay dapat na mapababa pa sa 1.00 o 1.1 upang matiyak na bababa na ang mga naitatalang bagong kaso ng COVID-19.

Ipinaliwanag niya na ang kasalukuyang 1.41 reproduction number sa Metro Manila ay nangangahulugan na ang dalawang infected na indibidwal ay maaaring makahawa ng tatlong katao.

Iniulat din niya na ang Metro Manila ay nakapagtala ng record-high na mahigit 6,000 kaso nitong Sabado.

Nagbabala pa siya na maaaring tumaas pa ang naturang numero sa mga susunod na linggo.

Samantala, kahit naman nakapagtala na ang bansa ng ‘all time-high’ na 22,366 bagong kaso ng COVID-19 noong huling bahagi ng Agosto, sinabi ni David na hindi pa aniya ito ang ‘peak’ ng mga COVID-19 cases at maaaring mas lumaki pa ang naturang bilang.

“‘Yung 22,000 na nakita natin, ‘di pa peak ‘yun. Baka malampasan natin ‘yun. Baka puwedeng mangyari ngayong araw o bukas or these coming weeks,” dagdag pa ni David. Ana Rosario Hernandez