RETIRED PROF NG UE NATAGPUANG PATAY

PATAY na nang matagpuan ang isang retired professor ng University of the East (UE) na nakalubog ang ulo at katawan sa isang drum ng tubig sa loob ng kanyang comfort room sa Malabon City kamakalawa ng hapon.

Nakilala ang biktima na si Emilie Cruz, 64-anyos, single, residente ng 111-B Valdez St. Brgy. Catmon, Malabon City.

Nadiskubre ang bangkay bandang ala-1kamaka­lawa ng hapon ng kanyang pamangkin na si Ivy Rose Capili ang wala ng buhay na biktima sa loob ng CR nito second floor ng bahay.

Ayon kina Malabon police homicide investigators P/SSgt. Corazon Nuque and P/SSgt. Ernie Baroy, nagpunta si Capili sa kuwarto ng kanyang tita upang tingnan kung natapon na ang kanyang basura subalit sa kabila ng kanyang mga pagkatok ay hindi sumasagot ang biktima na naging dahilan upang tanungin nito ang kanyang ina na si Thelma Loberto kung nasaan ang kanyang tita.

Pinuntahan ni Thelma at kanyang anak ang kuwarto ng biktima subalit, hindi nila ito nakita hanggang sa tinu­ngo nila ang comfort room malapit sa kusina.

Nang buksan ang ilaw, laking gulat nila nang makita ang biktima na nakalubog sa drum ng tubig na naging dahilan upang alisin nila ang katawan nito sa drum saka tinangkang i-revive subalit wala na itong buhay.

Inirekomenda sa pamilya nito ang autopsy examination subalit tumang­gi sila at sa halip ay gumawa ng isang waiver na naniniwala sila na walang foul play sa insidente na kung saan ay posibleng inatake ang biktima. VICK TANES