ROBIN WALA NA NAMAN SA TABI NI MARIEL NANG MANGANAK SA US

ISINILANG  na ni Mariel Rodriquez ang second baby girl nila ni Robin Padilla sa Tate. Si Robin mismo ang nagbalita sa pamamagitan ng kanyang Instagram account kamakailan.

Ayon kay Robin, natupad  daw ni Mariel ang pangarap nito na magsilang  ng  sanggol  via  natural delivery.

“In the name of the Father. A father is neither an anchor to hold us back nor a sail to take us there but  a  guiding  light  whose love  shows  us  the way.

“Today,  Maria Gabriela de Padilla was born. God is great! My wife had her  dream fulfilled again. Gabriela was delivered by natural birth. Praise God, everything was very  smooth with her family in the US. Especially  her  dad who  watched over her,” caption ni Robin sa larawan ni Mariel.

Matatandaan sa US din ipinanganak ni Mariel ang panganay nila ni Robin na si Isabella  at sa ikalawang pagkakataon nga ay sa Tate rin nga ito nanganak na hindi na­damayan ulit ni Robin dahil pinagkaitan na naman ng US Visa ang actor.

Walang magawa si Robin kahit na marami na rin ang tumulong sa kanya para makakuha o mabigyan ng US visa. Pinagkaitan pa rin siyang mabigyan ng visa.

Marami  tuloy ang  nagtatanong, bakit hanggang ngayon  daw  ay ayaw  bigyan  o  pagkalooban ng US Visa si Robin Padilla?

JANNO GIBBS AT MANILYN REYNES TANDEM SUSUGALAN

MALA­KING sugal nga ang pagsasama muli sa big screen ng dating magka-loveteam na sina Janno Gibbs at Manilyn Reynes.

Tinawag  nga sa kanila ngayon ng kanilang fans ay Jannolyn. Sumikat ang loveteam nina Janno at Manilyn  noong `80s kung saan lahat halos ng kanilang pelikulang ginawa ay tumabo sa takilya.

Bentang-benta nga sa kanilang followers ang duet nila sa That`s Entertainment.

Nagtambal  sila uli  sa TV sa pamamagitan ng teleserye na Meant To Be at ngayon nga ay balik-tambalan sila sa big screen na Mang Jose.

That time ay marami nga ang nagsabi na silang dalawa ang magkakatuluyan  dahil  sobrang sweet at hindi na sila mapaghiwalay. Pero hindi nga nangyari dahil pinakasalan ni Janno si Bing Loyzaga at si Manilyn naman ay  ikinasal  kay Aljon Jimenez.

Sana  mag-klik ang balik tambalan at  mag-klik din ang movie nilang ginagawa.

TAGALOG MOVIE MUKHANG LALANGAWIN

KAHIT na anong gimik pa ang gawin para maging successful ang Tagalog movie  na nakatakdang ilabas sa mga sinehan ay isa lang ang sigurado, hindi  ito  magiging successful dahil mangilan-ngilan lang ang magtatangkang  pa­noorin ito sa mga sinehan.

Ang tao ngayon ay nakasentro ang pag-iisip sa darating na Kapaskuhan at hindi muna gagastos ng walang katuturan.

Kung manood man siguro ang mga kababayan natin sa mga sinehan ay sisiguruhin nila na worth it ang kanilang panonoorin at hindi ‘yung  hubaran lang ang tema ng pelikula para makapang-akit ng mga moviegoers.

Sad to say na hindi gaanong papatok sa ta­kilya ang mga pelikulang nakatakdang ilabas nga­yon at sa mga susunod na araw.

Asahan na lang ang pagbawi sa takilya ng tagalog movie sa darating na Metro Manila Film Festival.