ROOKIE-MVP SI CANINO

ITINANGHAL si Angel Canino ng De La Salle University bilang Rookies of the Year at Most Valuable Player ng UAAP Season 85 women’s volleyball tournament.

Nakalikom si Canino ng 89.375 statistical points (SPs) upang kunin ang top individual award makaraang pumangatlo sa scoring na may 227 points, fourth sa spiking na may 36.42 percent efficiency, fourth sa reception na may 40.85 percent rate, seventh sa service na may 0.27 ace per set, at ninth sa blocking na may 0.44 kill blocks per frame.

Bukod sa MVP, tinanggap din ni Canino ang 2nd Best Outside Spiker award. Ang kanyang teammates na sina Jolina Dela Cruz, Thea Gagate, at Mars Alba ay itinanghal na 1st Best Outside Spiker, 1st Best Middle Blocker, at Best Setter, ayon sa pagkakasunod-sunod.

Si Far Eastern University’s Jovelyn Fernandez ang Best Opposite Spiker, habang si University of Santo Tomas’ Bernadett Peptio ang Best Libero. Si University of the Philippines’ Nina Ytang ang 2nd Best Middle Blocker.

Si Canino ang unang La Salle MVP magnula nang magawa ito ni Majoy Baron noong 2017 at ang ikalawang rookie-MVP ng liga.

Sa men’s side ay itinanghal din si Josh Ybañez ng University of Santo Tomas bilang rookie-MVP.

Nakakolekta si Ybañez ng 96.00 statistical points (SP) matapos na pumangalawa sa scoring na may 292 points, first sa spiking na may high success rate na 45.74 percent, first sa service na may 0.36 aces per set, at second sa reception na may efficiency rate na 56.99 percent.

Si Ybañez ay napili ring 1st Best Outside Spiker, habang si Michaelo Buddin ang 2nd Best Outside Spiker. Iginawad kay National University’s Obed Mukaba ang 1st Best Middle Blocker award habang si La Salle’s Billie Anima ang 2nd Best Middle Blocker. Si UST’s Jack Ray dela Noche ang Best Opposite Spiker, habang Best Libero at Best Setter sina Lance de Castro ng Ateneo de Manila at Joshua Retamar ng NU, ayon sa pagkakasunod.

Si Ybañez ang unang rookie-MVP matapos ni Marck Espejo sa Season 77 at una mula sa UST makaraang makopo ito ni Mark Alfafara noong Season 75.