(Sa paglagda ni Duterte sa 2020 budget) GOV’T PROJECTS TULOY-TULOY

NILAGDAAN na kahapon ni Pangulong Rodrigo Duterte ang P4.1-trillion 2020 national budget na mas malaki ng 12 porsiyento kumpara sa 2019 budget.

Ang paglalagda ng Pangulo sa General Appropriations Act (GAA) 2020  ay ginanap sa  se­re­monya sa Rizal Hall sa Malakanyang.

Pinakamalaking ba­hagi ng pondo ay nakalaan para sa social services sector na nasa P1.495 trillion   na sakop ang edukasyon at  kalusugan.

Nakalaan naman ang 29.3 porsiyento ng pondo sa 2020  sa economic services na may kabuuang P1.2 trillion.

Malaki ang inilaang pondo sa Department of Public Works and Highways (DPWH) at Department of Transportation (DOTr) para sa infrastructure projects ng gobyerno sa ilalim ng Build Build Build program.

Para naman sa mga kongresista, magreresulta sa tuloy-tuloy na programa ng pamahalaan ang paglagda ng Pangulo sa  P4.1-trillion 2020  budget.

Sinabi ni  House Appropriations Committee Chairman at Davao City Rep. Isidro Ungab na  mahalaga na mayroong operating budget ang bansa sa unang linggo pa lamang ng taon.

Bukod sa pagpapalakas ng ekonomiya, masisiguro nito na hindi mahihinto ang mga nakalinyang proyekto para sa kabuhayan ng mga Pinoy.

Ayon pa kay  Cavite Rep. Elpidio Barzaga, idinisenyo ang 2020 budget para suportahan ang pagpapatatag ng pamumuhay ng mga Fi­lipino lalo na ang mga ordinaryong mamamayan.

Una nang  inihayag ng mga eksperto ang kanilang forecasts na bibilis ang paglago ng ekonomiya ngayong taon.

Ayon kay Philippine Chamber of Commerce and Industry (PCCI) chair Alegria Limjoco,  dahil sa maagang pagpasa sa national budget ay ina­asahang wala nang delay sa pagpapatupad ng mga proyekto ng gobyerno.

Nakikita rin ang mataas na GDP growth ngayong taon  sa on-time na pagpapalabas ng P4.1 trilyong 2020 national budget.

“Malaking tulong sa mga proyekto ng gob­yerno ang natitirang  P400 bilyon na budget  na natitira sa 2019. “That means more blessings in 2020,” pahayag pa ni Limjoco.

“We are growing 7 percent this year and the next decade. We are in the center of growth,” paha­yag ni Limjoco, na u­nang babaeng nahalal para pamahalaan ang PCCI. PILIPINO MIRROR Reportorial Team