(Sa PUV drivers, operators) SERVICE CONTRACTING SANA ALL

HINIMOK ni Senadora Risa Hontiveros ang Department of Transportation (DoTr) at ang Land Transportation Franchising and Regulatory Board (LTFRB) na isama sa service contracting program ang public utility vehicle drivers at operators na hindi pa kabilang sa PUV modernization.

“Sinusuportahan ko ang paglalagay ng malaking budget para sa service contracting program ng LTFRB. Pero inaalala ko na baka i-discriminate o  hindi isali ang mga tsuper na hindi pa kabilang sa PUV modernization program ng gobyerno,” anang senadora.

“Ang service contracting ay dapat para sa lahat, hindi lang para sa kasama na sa PUV modernization program. Wala dapat diskriminasyon sa operators at drivers at dapat siguruhing lahat ay may pagkakataong sumali sa service-contracting at libreng sakay program,” dagdag pa niya.

Iginiit ni Hontiveros na hindi bababa sa 50 porsiyento ng jeepney at UV operators ang hanggang ngayon ay hindi pa nakikiisa sa programa dahil sa mga isyu at problemang kinakaharap sa implementasyon nito.

Matatandaan na sa isang forum na ginanap ng UP National Center for Transport Studies, inihayag ng DoTr ang layuning gawing pangunahing bahagi ng modernisasyon ng PUV ang service contracting.

Nangangahulugan ito na ang nakalaang badyet para sa service contracting ay maaaring gamitin para maengganyo ang hindi pa kabilang sa programa.

Punto ni Hontiveros, kahit gusto ng mga tsuper at operator na maging bahagi ng PUV modernization, may mga dahilan kung bakit sila nag-aalangan.

Kabilang dito ang matinding pagtaas ng presyo ng mga makabagong jeepney at bus, gayundin ang mga produktong petrolyo, pero limitado pa rin ang puwedeng maisakay sa isang biyahe.

“Our drivers are deep in debt and their cooperatives naturally hesitate to take on more debt — which is unavoidable under the fleet replacement scheme. Hindi natin sila masisisi kung hanggang ngayon, hindi pa rin sila makausad. There is too much uncertainty that casts doubt on the viability of the program as it was originally designed,” ani Hontiveros.

Dahil dito, hinimok niya ang mga kinauukulang ahensiya na tingnan ang solusyon na iminungkahi ng mga transport group na gobyerno ang bumili ng modern jeep at iparenta na lamang sa mga kooperatiba. VICKY CERVALES