SA halip na bawasan lamang ang dami ng papel na ginagamit sa pagsasagawa ng mga tungkulin nito, ang Sangguniang Panlungsod ng San Juan City ay “paperless” na ngayon sa mga sesyon at pagdinig ng komite simula pa nitong Nobyembre 7.
Ito ang naisip na paraan ni Vice Mayor Jose Warren Villa, kung paano maaalis ng Konseho ng Lungsod ang paggamit ng papel sa mga pagpupulong sa tulong ng teknolohiya.
Sinimulan nilang gamitin ang kanilang mga tablet na may mga app na nagpapadali para masuri ang bawat dokumento at i-edit din sa halip na gumamit ng mga naka-print.
“Maaaring ito ay isang maliit na hakbang ngunit ito ay isang magandang simula na susundan ng mas maraming programa at proyekto. Kami sa San Juan City Council at San Juan City Government ay nakatuon sa pangangalaga sa kapaligiran,” ani Villa.
Sa pamamagitan ng internet, ang mga miyembro ng konseho ay maaaring tumanggap at mag-imbak ng mga file sa kani-kanilang mga aparato upang madaling ma-access ang mga ito sa panahon ng kanilang mga sesyon at pagdinig ng komite.
Maaari rin silang mag-edit, gumawa ng mga tala at komento at kahit na sumang-ayon, tumutol at aprubahan ang mga ordinansa at resolusyon online.
Ito ay isa pang pagbabago para sa San Juan City Council na mas mahusay kaysa sa iba pang mga lokal na pamahalaan dahil ito ay ganap na “zero-paper.”
Ang mga hamon na dala ng pagbabago ng klima ang humimok sa San Juan City Council na mag-ambag sa pagbabawas ng carbon emissions sa pamamagitan ng paggamit ng teknolohiya.
“Nagpapasalamat ako kay Vice Mayor Warren at sa ating mga konsehal, gayundin sa ating Sanggunian Secretariat, sa pangunguna at pagpapakita sa ating mga empleyado ng city hall na magagawa ito,” pahayag ni Mayor Francis Zamora. ELMA MORALES