SARANGANI NAKAISA RIN SA MPBL

MULING napalaban sa krusyal na sandali ang Sarangani, ngunit sa pagkakataong ito sapat ang lakas at katatagan ng Marlins para makaiwas sa tuluyang pagkabalahaw sa impresibong 75-66 panalo laban sa Muntinlupa sa pagpapatuloy ng 2021 Chooks-to-Go Maharlika Pilipinas Basketball League Invitational elimination nitong Miyerkoles sa SM Mall of Asia Arena sa Pasay City.

Kumasa si Jordan Sta. Ana para maisalba ang kampanya ng Marlins sa naiskor na 18 puntos mula sa 8-of-13 shooting clip para sa unang panalo ng Sarangani matapos ang 0-2 simula sa torneo na may basbas ng Games and Amusements Board (GAB).

“Masaya, sobra. Talagang gusto naming manalo siyempre ‘yung inspiration ko kasi nung kinuha ako dito sa Sarangani is ‘yung nangyari sa team ko last season,” pahayag ni Sarangani head coach John Kallos, patungkol sa kabiguan ng dati niyang koponan na Caloocan sa nakalipas na Lakan playoffs.

“Dinala ko lang ‘yung culture na ‘di tayo nagpapatalo, tapos ‘yung image ng Sarangani is pangit for the last season,” aniya matapos maitala ng Sarangani ang 1-29 marka sa nakalipas na Season. “Yun talaga ‘yung inspiration namin, na ‘di ka naman manalo pero ‘yung imahe na lumalaban ka.”

Malamya ang simula ng Marlins, ngunit nagawa nitong makaigpaw sa third quarter, sa pangunguna ni Gabby Espinas, para sa 13 puntos na bentahe, 58-45.

Nagawang makadikit ng Muntinlupa sa anim na puntos sa fourth period, subalit sapat ang lakas at katatagan ng Sta. Ana para sa 65-56 kalamangan tungo sa panalo.

Nag-ambag si Marvin Lee ng 14 puntos, limang assists, apat na steals, at dalawang rebounds para sa Sarangani, habang kumana si Yvan Ludovice ng 12 puntos, limang rebounds, limang  steals, at apat na assists.

Nanguna si Chino Mosqueda sa Muntinlupa na may 12 puntos, anim na rebounds, at limang assists.

Sunod na makakaharap ng Sarangani ang Val City-MJAS Zenith sa Sabado, alas-7:30 ng gabi, habang babawi ang Muntinlupa sa  San Juan-Go for Gold AICC sa Biyernes, alas-7:30 ng gabi.

Nitong Lunes, naisalpak ni Pao Javillonar ang game-winner para makalusot ang  Caloocan Excellence laban sa Negros, 80-79.

Nakamit naman ng Makati-FSD ang unang panalo nang pabagsakin ang Marikina, 95-89, habang naisahan ng Val City-MJAS Zenith ang Muntinlupa, 76-72, para sa unang panalo sa Pool C ng torneo na itinataguyod ng Chooks-to-Go Pilipinas. EDWIN ROLLON

Iskor:

Sarangani (75) – Sta. Ana 18, Lee 14, Ludovice 12, Espinas 9, Acosta 8, Basibas 5, Sanga 5, Munsayac 3, Sarangay 1, Marilao 0, Bautista 0, Dator 0

Muntinlupa (66) – Mosqueda 12, Destacamento 11, Vidal 10, Gw. Capacio 9, Ortuoste 8, Saitanan 6, Bagatsing 4, Alano 3, Ga. Capacio 2, Ylagan 1, Dixon 0, Peralta 0

QS: 15-24, 42-33, 60-48, 75-66