SB MEMBER PATAY SA COVID-19

ISABELA-ISANG Sangguniang Bayan (SB) member ang nasawi matapos tamaan ng COVID-19 sa bayan ng San Isidro sa lalawigang ito.

Kinumpirma ni San Isidro Mayor Vilmer Bravo ang pagpanaw ni SB member Froilan Tumamao na aktibong naglilingkod bilang opisyal ng nasabing bayan.

Sa pahayag ng punong bayan, nagkaroon umano ng sintomas ng COVID-19 si Tumamao nang magtungo ito sa pagamutan kung saan naka-admit ang isa nitong kamag-anak na positibo rin sa virus na nasawi rin makalipas ng ilang araw.

Binalewala umano ng SB member ang kanyang nararamdaman at naging kampante kaya’t nag-isolate lamang pero sumailalim pa rin siya sa swab test at lu­mabas na positibo sa COVID-19.

Nagpadala lang ito sa pagamutan nang malala na ang kanyang sitwasyon kung saan dalawang ospital pa ang kanyang pinuntahan dahil may scheduling dahil sa puno na ang mga hospital.

Dahil hindi na maganda ang kondisyon ni Tu­mamao ay bumigay na ang katawan at binawian ng buhay.

Ayon kay Bravo, dahil sa patuloy ang paglobo ng COVID-19 sa kanilang bayan ay nagkasundo na lalo pa hihigpitan ang mga restriction lalo na ang karamihan sa mga nahahawa ng virus ay ang mga nagtatrabaho sa mga karatig nilang lugar.

Sa kasalukuyan,naka-lockdown ng tatlong araw ang munisipyo ng San Isidro at nagsasagawa na ng malawakang SWAB testing dahil nakadalo pa sa hu­ling session ng Sangguniang Bayan si Tumamao.
IRENE GONZALES