SEA GAMES ON TRACK NA

TINIYAK ni Senador Christopher Bong Go  na ‘on track’ na ang preparasyon ng  bansa para sa hosting ng Southeast Asian Games  na magsisimula sa Nobyembre 30 at magtatapos sa Disyembre 11.

Ayon sa senador, sampung araw na lang at magsisimula na ang SEA-games sa bansa na kung saan ay patuloy ang pagmo-monitor ni Executive Secretary Salvador Medialdea kasama na ang paghahanda sa mga lugar na pagdarausan, seguridad at iba pang preparasyon.

Kaugnay nito, nagpasalamat si Go sa mga ahensiya at mga kababayan na nag-volunteer na tumulong para maging matagumpay ang hosting ng bansa sa SEA games.

Sinabi pa nito, ilang taon na rin ang nakaraan mula nang huling nag-host ang bansa  sa biennial meet kaya naman pagkakataon na itong muli upang patunayan ang husay sa  pag-aasikaso sa mga bisita.

Dahil dito, umaasa ang senador  na aangat ang bansa mula sa dating  ika-6 na puwesto sa Malaysian SEA games.

Siniguro ni Go na nakatutok ang ehekutibo sa preparasyon na ngayon ay nasa 90-95% nang handa ang iba’t ibang venue ng mga laro sa bansa.

Kaugnay nito, muling nilinaw ng senador na walang anomalya ang cauldron na nagkakahalaga ng  P55 milyon at  kung sakaling mayroong iregularidad ay handa siyang pangunahan ang imbestigasyon hinggil dito. VICKY CERVALES