BATID ni Philippine Athletics Track and Field Association (Patafa) president Philip Juico na may anim siyang atleta na may kakayahang magwagi ng gold medals sa 30th Southeast Asian Games.
Subalit hinamon din niya ang kanyang potential silver medalists na gawin ang lahat para makuha ang gold.
“Ang sabi namin sa kanila (possible silver medallists), you guys who are capable of silver, tirahin ninyo na. Try your best to win the gold. Kasi sabi nila, a silver can also be gold,” wika ni Juico.
Sa pagtaya ng Patafa, hahakot ang mga trackster ng 6-10-8 medalya sa nalalapit na athletics’ competitions ng biennial meet na idaraos sa Dec. 5-10 sa 20,000-seat New Clark City athletics’ stadium sa loob ng 9,500-hectare NCC sports complex.
“Sa triple jump, it’s Harry Diones. He has been a little inconsistent, kaya lang tumataas ang ranking niya. From silver, puwedeng mag-gold iyan. In decathlon, it’s Aries Toledo, who won gold in Kuala Lumpur. Probably good for a silver, pero puwede ring mag-gold,” sabi ni Juico. “We urge them to go for it. Ibigay na ang lahat for our country.”
Ang pagtaya ay lubhang konserbatibo kay reigning marathon champion Mary Joy Tabal dahil sa pares ng Thai runner.
“It (gold count) could be anywhere between 6 to 12 golds. That’s (12) the most optimistic,” dagdag pa niya.
Ang mga trackster na may kakayahang maka-gold sa biennial meet ay sina pole vaulters Ernest John Obiena at Natalie Uy, 800-meter specialist Carter Lilly, hurdles champ Eric Cray, sprinter Kristina Knott at new recruit, shot-putter William Morrison.
Ang 21-anyos na si Morrison ay pumukol sa layong 20.4 meters sa isang torneo sa Bloomington, Indiana noong nakaraang Hunyo. Ang nasabing marka ay mas malayo sa 17.42 meters na naitala ni Promrob Juntima ng Thailand nang makopo niya ang gold medal sa 2017 SEA Games.
Sa katunayan, si Morrison ay kapos lamang ng kalahating metro para sa Olympic standard na 21.1 na magbibigay sa kanya ng tiket sa 2020 Tokyo Olympics.
“Morrison is a candidate for the Olympics. Kaya because he is throwing in the 20s,” ani Juico.
Isa pang Fil-Am, sa katauhan ni Cray, ang best bet sa men’s 400-meter hurdles dahil siya ang no. 1 sa SEA rankings.
Nariyan din si Lilly, na may kakayahang magtala ng mas mabilis sa 1:48.00 sa men’s 800-meter run.
Samantala, sina pole vaulters Obiena at Uy, ang gold at bronze medalists ayon sa pagka-kasunod sa Asian Athletics Championship sa Doha, Qatar, ang kasalukuyang pinakamahusay sa rehiyon.
Comments are closed.