PAMPANGA- ARESTADO ang isang senior citizen sa bayan ng Masantol sa lalawigang ito makaraang tanggapin ang package na naglalaman ng imported na droga mula sa California, USA.
Base sa inisyal na report ng mga tauhan ng Philippine Drug Enforcement Agency Region-3 kinilala ang nadakip na suspek na si Abner V. Bautista, 63-anyos ng Barangay Sta.Lucia, sa nabangit na bayan.
Dinakip si Bautista sa pamamagitan ng entrapment operation nitong Miyerkules ng gabi nang tanggapin nito ang isang package na naglalaman ng imported na 50 gramo ng shabu na nagkakahalaga ng P345,000.00.
Dumating sa Port of Clark nitong Pebrero 18 ang package na naglalaman ng imported na shabu mula sa California, USA.
Natukoy ang kontrabando sa pamamagitan ng X-ray ng BOC at K-9 Sniffing dog.
Katuwang ng PDEA Central Luzon ang Clark Inter-Agency Task Group, Bureau of Customs (BOC) Port of Clark at Masantol Police Station.
Samantala, sasampahan ng kasong paglabag sa Section 4 (importation of dangerous drugs) si Bautista.
THONY ARCENAL