SHOOTOUT: 1 PATAY, 2 KRITIKAL

CAVITE – ISA ang napatay habang dalawa naman ang malubhang nasugatan matapos itong makipagbarilan sa mga operatiba sa itinayong PNP checkpoint sa kahabaan ng Carlos Trinidad Avenue sa Brgy. Salawag, Dasmarinas City sa lalawigang ito kahapon ng madaling araw.

Hindi na umabot ng buhay sa pagamutan ng Dasmarinas ang suspek na si Domingo Macunay y Abenoja ng Brgy. Moonwalk V, Las Pinas City habang nasa malubhang kalagayan naman ang dalawang gunmen na sina Jose Pepito Rusco y Velasquez, 36-anyos; Abdul Samie Sultan y Umadan, 33-anyos.

Base sa police report na nakarating sa Camp Pantaleon Garcia, lumilitaw na nagsasagawa ng Oplan Sita Operation ang ilang personnel ng PCP 4 Salawag, Dasmarinas CPS nang pahintuin nila ang puting taxi na walang plaka at lulan ang 3 suspek.

Gayunpaman, imbes na huminto ang sasakyan ng mga suspek ay pinaharurot ito sabay na niratrat ang mga pulis na nagbabantay sa checkpoint.

Gumanti ng putok ang mga pulis kung saan tinamaan ang mga suspek na naisugod naman sa nasabing ospital subalit idineklarang patay si Domingo.

Samantala, narekober sa sinasakyan ng mga suspek ang isang fragmentation hand grenade, cal. 38 revolver na walang serial number, isang FCC; dalawang cal. 45 pistol na may serial # 916394 habang ang isa pa ay walang serial number na may 18 live ammunitions at 2 FCC; 4 FCC para sa M16 Armalite rifle; 9 FCC para sa cal.9mm pistol; 2 plastic sachet na shabu at pinatuyong dahon ng marijuana at dalawang helmet. MHAR BASCO

Related posts:

TULAY BUMAGSAK: 5 TODAS, 2 KRITIKAL