BATAAN- NILAMON ng naglalagablab na apoy ang ikalawang palapag ng isang shopping center nitong Martes ng hapon sa panulukan ng Barangay Bonifacio at Zamora sa Plaza Poblacion, Dinalupihan.
Mabilis na natupok ng apoy ang ikalawang palapag JCY building kung saan naroon ang MMC Shopping Center at iba pang mga katabing establisimiyento na kung saan ang isa sa mga ito ang umano’y pinagmulan ng sunog.
Sa ulat mula kay Dinalupihan Fire Marshal Chief Inspector Arvin Carpon, nagsimula ang sunog pasado ala-1:25 ng hapon.
Idineklarang fire under control pasado alas-3 ng hapon kung saan tumagal ng halos dalawang oras ang sunog.
Nagtulong-tulong ang mga pamatay sunog mula sa iba’t’-ibang lugar at kalapit bayan.
Inaalam pa ng mga awtoridad ang halaga ng pinsala ng sunog at wala naman naiulat na nasaktan sa insidente. ROEL TARAYAO